प्रदेश १ लाई हराउँदै एपीएफ फाइनलमा
बाँके । एपीएफ क्लब आठौं राष्ट्रिय खेलकुद अन्तर्गत पुरुष क्रिकेटको फाइनलमा प्रवेश गरेको छ ।
मंगलबार भएको पहिलो सेमिफाइनलमा एपीएफले प्रदेश १ लाई ८ विकेटले पराजित गर्यो ।
कोहलपुर अन्तराष्ट्रिय क्रिकेट मैदानमा प्रदेश १ ले दिएको ५० रनको लक्ष्य एपीएफले १० ओभर ५ बलमा मात्र २ विकेट गुमाएर पुरा गर्यो ।
एपीएफको जितमा शंकर रानाले अविजित २३ रन जोड्दा प्रदिप ऐरीले अविजित १७ रन बनाए । एपीएफका शरद भेषवाकर २ रनमा आउट हुँदा अनिल साह ७ रनमा पेभेलियन फर्किए ।
प्रदेश १ का दिपेश कँडेल र पुष्प थापाले १/१ विकेट लिए ।
यसअघि टस जितेर पहिले ब्याटिङ गरेको प्रदेश १ ले १६ ओभर ३ बलमा अलआउट हुँदै ४९ रन बनाएको थियो । प्रदेश १ का लागि मनिस थापा र सन्नी पुनले समान १४/१४ रन जोड्नु बाहेक अन्य ब्याट्सम्यानले दोहोरो अंक जोड्न सकेनन् ।
एपीएफका शरद भेषवाकर एक्लैले ४ विकेट लिए । यस्तै कप्तान बसन्त रेग्मीले ३ विकेट लिए ।
खेलमा प्लेयर अफ दि म्याच एपीएफका शरद चुनिए ।
अब उपाधिका लागि एपीएफले पुलिस र आर्मीबीचको विजेतासंग खेल्नेछ ।
