आठौंमा आज १८ खेल

बाँके । आठौं वृहत राष्ट्रिय खेलकुद अन्तर्गत आज (शनिबार) १८ खेल हुदैछन् । प्रदेश नम्बर ५ मा सञ्चालन भईरहेको प्रतियोगितामा शनिबार १८ खेलका विभिन्न स्पर्धामा प्रतिस्पर्धा हुनेछ ।

शनिबार पुरुष र महिला फुटबलका समुह चरणका बाँकी खेलहरु हुनेछन् । बिहान र बेलुका गरि दुई सत्रमा सञ्चालन गरिएका पुरुष टिमका खेल एन्फा टेक्निकल सेन्टर बुटवल र नेपालगञ्जमा भईरहेका छन् । त्यस्तै महिला टिमका खेल दाङमा सञ्चालन गरिएको छ ।

विभिन्न राष्ट्रिय कीर्तिमान सहित चर्चामा आएको एथ्लेटिक्सका विभिन्न स्पर्धा दाङको बेलझुण्डीमा हुनेछ । एथ्लेटिक्सतर्फ शनिबार हडल्सको हिट्स तथा दुई सय र दुई सय मिटरको महिला पुरुषको हिट्स चरणका खेल हुनेछन् । त्यस्तै हाईजम्प, डिस्कस र दुई समय मिटरको फाईनल खेल समेत समापन गर्ने तालिका छ ।

यस्तै दाङको तुलसीपुरमा कराँतेका खेल सुरु हुदाँ भैरहवामा तेक्वान्दोका खेल सञ्चालन गरिनेछ । बाँकेको खजुरामा भलिवलका खेल सञ्चालन हुदाँ दाङमा व्याडमिन्टनका खेल सकिनेछन् ।

नेपालगञ्ज रंगशालामा उसु र ह्यान्डबलका खेल हुनेछन् । आई टि एफ तेक्वान्दोको खेल नेपालगञ्जको महेन्द्र क्याम्पसमा सञ्चालन हुनेछ ।

सुटिङका खेल नेपालगञ्ज सुटिङरेन्जमा हुनेछ भने नेपालगञ्जकै जुडो हलमा जिम्न्याष्टिकका खेल चल्नेछ ।

रुपन्देहीमा सफ्ट टेनिसका केही स्पर्धामा फाईनल खेलहरु हुनेछन् । कोहलपुर र लमहीमा क्रिकेटका खेल यथावत चल्नेछन् ।

नेपालगञ्जको प्रहरी तालिम केन्द्रमा आर्चरी हुदाँ बर्दियाको गुलरियामा सेपाकटाक्रो र खोखोका खेल सञ्चालन गरिनेछ । र एसियन गेम्समा रजत जितेको प्याराग्लाईडिङको राष्ट्रिय खेल पोखरामा हुनेछ ।

आठौंको शुक्रबारसम्म १२१ स्वर्णसहित कुल ४४३ पदकको टुंगो लागिसकेको छ । जसमा विभागीय टोलीले आफ्नो वर्चश्व कायम गरेका छन् ।

पदक तालिकामा हालसम्म विभागीय टिम त्रिभुवन आर्मी क्लबले सर्वाधिक पदक जितेको छ । आर्मीले ४५ स्वर्ण, ३१  रजत र २७ कास्य पदकसहित कुल १०३ पदक जितेको छ ।

यस्तै नेपाल पुलिस क्लबले २२  स्वर्ण, २०  रजत र २१ कास्य पदकसहित कुल ६३ पदक जितेको छ । सशत्र प्रहरीको एपीएफ क्लबले १७ स्वर्ण, १६ रजत र २८ कास्यसहित कुल ६१ पदक जितेर तेस्रो स्थानमा रहेको छ ।