नेपालगञ्ज । बिहिबार मध्यान्न नेपालगञ्ज रंगशाला परिसरमा छिर्दा मुलबाटो पक्की बनाउने काम अन्तिम चरणमा थियो । अलकत्रा बिछ्याउने काम सकिएको थियो । कामदारहरु चर्को घाममा सुस्ताई रहेका थिए ।
नेपालगञ्ज रंगशालाले यतिबेला धेरैको ध्यान खिचेको छ । यही रंगशालामा आठौं राष्ट्रिय खेलकुदको उद्घाटन र समापन हुनेछ । पुर्वाधारको हिसावले सरकारले नेपालगञ्ज रंगशालाको पुर्ननिर्माणमा ठुलो धनराशी खर्च गरेको छ । तर उद्घाटनको दिनसम्म रंगशालाको प्याराफिट निर्माणले पुर्णता पाउँछ वा पाउदैन निर्माणमा संलग्न ईन्जिनियर समेत अनविज्ञ छन् ।
‘उद्घाटनको दिनसम्म प्याराफिट निर्माण गरिसक्ने लक्ष्य छ । तर कामको गति हेर्दा भन्न सकिने अवस्था छैन ।’ निर्माण स्थलमा भेटिएका एक ईन्जियरले भने, ‘नत्र अस्थायी प्याराफिट बनाएर भएपनि उद्घाटन गर्नपर्छ । समापनसम्म प्याराफिट जडानको काम सकिनेछ ।’
प्याराफिट निर्माणको सामान चैत १८ गतेसम्म आईपुग्ने कार्यतालिका थियो । तर सामान बोकेका कन्टेनर ढिला गरि नेपालगञ्ज आईपुगे । सामान २५ गते मात्र रंगशाला परिसरमा झरेका थिए । चीनियाँ ठेकेदार र कामदारहरु प्याराफिट निर्माणको काममा अनवरत रुपमा लागेका छन् । तर समयको चाप र कामको गतिले बैशाख ५ गतेभित्र प्याराफिट जडानले पुर्णता पाउन मुस्किल देखिन्छ ।
कामदारलाई अतिरिक्त ज्याला र सुविधा सहित दिउँसो र रातिको समयमा काम गर्न आग्रह नगरिएको होइन । तर उनीहरुले दुवै सत्रमा काम गर्न नसकिने बताएका छन् । सोही कारण भारतबाट कामदार ल्याएर प्याराफिट जडानको कामलाई दुई सत्रमा सञ्चालन गर्ने राष्ट्रिय खेलकुद परिषद् राखेपको तयारी छ ।
उद्घाटनको मुख्य केन्द्र नेपालगञ्ज रंगशालाको फुटबल मैदान तयारी अवस्थामा छ । मैदानमा ‘ट्रयाक’को आधारभुत काम सकिएको छ । साधारण प्याराफिट समेत बनिसकेको छ ।
चर्चामा आएको भीआईपी प्याराफिटको आधार र जग बनिसकेको अवस्था छ । भीआईपीतर्फको छाना हाल्ने काम सकिएको छ ।
प्रतियोगिता उद्घाटनको मिति जति नजिकिदै छ, पुर्वाधार निर्माणको काम जोडतोडले अघि बढेको देखिन्छ । मैदानमा खटिएका ठेकेदार र ईन्जिनियरलाई खाने फुर्सद छैन, कामदारलाई समेत सुस्ताउने समय देखिदैन ।
रंगशालाको प्याराफिट मात्र होइन, पौडी पोखरीको पुर्वाधार निर्माणको अवस्था समेत उस्तै छ । पौडी पोखरीमा ‘टायल’ हाल्ने काम अन्तिम चरणमा पुगेको छ । सो काम सकिने बित्तिकै पोखरीमा पानी हाल्ने काम अघि बढ्ने निर्माण शाखाका ईन्जिनियर विश्वमित्र सञ्जेलले बताए ।
तर पौडी पोखरीमा खेल सामाग्री जडान र प्रशोधन प्लान्टको जडान कार्य प्रतियोगिता अघि सम्भव छैन । असार मसान्तसम्म सो काम सकिने ईन्जिनियर सञ्जेल बताउँछन् ।
पौडी पोखरीको प्याराफिट तयारी अवस्थामा छ । चेन्जिङ रुम बनिसकेको छ । कम्पाउण्ड वालबाट पोखरीलाई घेरिसकेको अवस्था छ । मुख्य कुरा, निर्माणाधिन पौडी पोखरीले प्रतियोगिता अगाडी अन्तराष्ट्रिय मापदण्ड पुरा गर्ने छैन ।
अझ भनौ, अन्तराष्ट्रिय मापदण्डका आधारमा खेलाडीले पौडी पोखरीमा प्रतिस्पर्धा गर्न पाउने छैनन् ।
पौडी पोखरी जस्तै सुटिङको समेत निर्माण कार्य अन्तिम चरणमा छ । बनेका पुर्वाधारको ‘फिनिसिङ’ गर्न बाँकी छ । लगत्तै सुटिङको खेल सामाग्री जडान कार्य अघि बढ्नेछ । अहिलेसम्म सुटिङको हल बनाउने र शैचालयको निर्माण कार्यले पुर्णता पाएको देखिन्छ ।
पुर्वाधार निर्माणसंगै आठौं राष्ट्रिय खेलकुद अन्तर्गतका विभिन्न खेलहरु सुरु भईसकेको छन् । रमाईलो कुरा, प्रतियोगिताको उद्घाटन अघिनै आधा बढी खेल सकिने छन् ।
बाँके नेपालगञ्जमा हक्की, फेन्सिङका खेलहरु जारी छ । शुक्रबारबाट बक्सिङको खेल सुरु भएको छ । बर्दियामा बुद्विचाल सुरु भएको छ ।
अन्य जिल्लामा समेत आठौंका खेलहरु धमाधम सञ्चालन भईरहेका छन् । दाङमा ब्याटमिन्टन र बास्केटबलका खेल सञ्चालन भईरहेका छन् । ललितपुरमा स्क्वासको खेल अन्तिम चरणमा पुगेको छ ।
