आठौं राष्ट्रिय खेलकुद : बिहिबार सात खेल हुँदै

काठमाडौं । प्रदेश पाँचमा जारी आठौं राष्ट्रिय खेलकुद अन्तर्गत आज (बिहिबार) विभिन्न सात खेलमा प्रतिस्पर्धा हुँदैछ ।

आठौं अन्तर्गत बिहिबार हुने ७ खेलमध्ये दुई खेलको सुरुवात हुनेछ । पाँच खेल भने बुधबार बाटै सुरु भईसकेको छ ।

बिहिबार बास्केटबल र फेन्सिङ खेल सुरु हुनेछ । पुरुष बास्केटबल दाङको घोराहीमा सुरु हुनेछ । यस्तै फेन्सिङ नेपालगंजको कभर्डहलमा सुरु हुनेछ ।

यस्तै बिहिबार दाङको घोराही कभर्डहलमा टेबलटेनिस, कपिलवस्तुको सिद्धार्थ क्याम्पसमा कुस्ती, नेपालगंजको मंगलप्रसाद उच्च माविमा पुरुष हक्की, ललितपुरको सातदोबाटोमा स्क्वास र बुटवलमा लनटेनिस हुनेछ ।

आठौंको उद्घाटन भने बैशाख ५ गते हुनेछ । आठौंको उद्घाटन अघि विभिन्न १४ खेलको राष्ट्रिय प्रतियोगिता सम्पन्न भइसक्ने छ । उद्घाटनअघि सकिने खेलमा बक्सिङ, कबड्डी, जुडो, बास्केटबल, बुद्धिचाल, फुल कन्ट्याक्ट कराते, साइक्लिङ, फेन्सिङ र गल्फ रहेको छ ।

आठौं राष्ट्रियमा विभिन्न ३५ खेल समावेश छन् । बृहत राष्ट्रिय खेलकुदकै इतिहासमा प्याराग्लाइडिङ खेल पहिलो पटक समावेश गरिएको छ भने एनआरएनए टिम पनि पहिलोपटक सहभागी हुँदैछ ।

आठौं राष्ट्रियमा समग्रमा २८ सय २५ पुरुष तथा २३ सय ८६ महिला गरी जम्मा ५२ सय ११ खेलाडी सहभागी हुने छन् । ३७२ स्वर्ण, त्यत्ति नै रजत र ५६३ कांस्यका भिडन्त हुनेछ ।