होराले जित्यो १ करोड ९४ लाख रुपैयाँ
काठमाडौं। पब्जी मोबाइल विश्वकप २०२६ को उपाधि टर्कीको एसटुजी ई–स्पोर्ट्सले जितेको छ। निकै रोमाञ्चक र प्रतिस्पर्धात्मक ग्रान्ड फाइनलमा एसटुजीले १५४ अंक जोड्दै उपाधि आफ्नो नाममा गरेको हो।
दोस्रो स्थानमा रहेको एनएस रेडफोर्सले १४९ अंक जोड्यो भने अरोरा गेमिङ १४६ अंकसहित तेस्रो स्थानमा रह्यो। नेपालको होरा ई–स्पोर्ट्स भने १०९ अंकसहित आठौं स्थानमा रह्यो। योसँगै होराले एक लाख २७ हजार ५०० डलर अर्थात् एक करोड ९४ लाख ३३ हजार ४०९ रुपैयाँ सुरक्षित गर्यो।
प्रतियोगिताको अन्तिम दिन एसटुजी ई–स्पोर्ट्स, एनएस रेडफोर्स, अरोरा गेमिङ र ई–एरिना उपाधिको दौडमा थिए। एसटुजीसँग ‘स्म्यास नियम’मार्फत उपाधि चाँडै सुरक्षित गर्ने धेरै अवसर आए पनि टोलीले आवश्यक ‘चिकेन डिनर’ हासिल गर्न सकेन।
निर्णायक खेलमा गडलाईक ई–स्पोर्ट्सले एसटुजीलाई महत्त्वपूर्ण भिडन्तमा पराजित गर्दै खेलबाट बाहिर पठायो। त्यसपछि एसटुजीको उपाधि यात्रा अन्य दाबेदार टोलीको प्रदर्शनमा निर्भर भयो।
तर‚ एनएस रेडफोर्स, अरोरा गेमिङ र ई–एरिना पनि एसटुजीलाई उछिन्नुअघि नै प्रतियोगिताबाट बाहिरिए। यससँगै एसटुजीको १५४ अंक कायम रह्यो र टोली पब्जी मोबाइल विश्वकप २०२६ को च्याम्पियन बन्न सफल भयो।
अन्तिम खेल भने तियानबाले जितेको थियो। तर‚ त्यो समयसम्म एसटुजीले उपाधिका लागि आवश्यक अंक सुरक्षित गरिसकेको थियो।
एसटुजीको अर्को उपलब्धि
एसटुजी ई–स्पोर्ट्सको यो जित टोलीको इतिहासमा अर्को ठूलो उपलब्धि बनेको छ। टोलीका हाम्सीजी यसअघि एसटुजीको २०२२ को पब्जी मोबाइल ग्लोबल च्याम्पियनसिप जित्ने टोलीका सदस्य थिए। उनले फेरि अर्को ठूलो विश्वस्तरीय पब्जी मोबाइल उपाधि उचालेका छन्।
एसटुजी अब अल्फा सेभेनसँगै पब्जी मोबाइल ग्लोबल च्याम्पियनसिप र पब्जी मोबाइल विश्वकप दुवै जित्ने टोली बनेको छ।
(एक डलर = १५२.४२ रुपैयाँ)
