अस्ट्रेलियाको भूमिमा बंगलादेशको ऐतिहासिक टेस्ट जित

काठमाडौं। अस्ट्रेलियाको भूमिमा टेस्ट खेल्नका लागि बंगलादेशले २३ वर्ष कुर्नुपर्‍यो। डार्विनमा त्यो प्रतीक्षा अन्त्य हुँदा बंगलादेशले यस्तो इतिहास रच्यो, जुन सबैभन्दा आशावादी समर्थकले समेत सायद कल्पना गरेका थिएनन्।

अस्ट्रेलिया पुग्दा बंगलादेशलाई कमजोर टोलीका रूपमा हेरिएको थियो। अभ्यास खेलमा क्रिकेट अस्ट्रेलिया–११ विरुद्ध टोली ५४ रनमै अलआउट भएको थियो। त्यसैगरी, घरेलु टोलीसँग ३०० भन्दा बढी टेस्ट विकेट लिइसकेका चार जना अनुभवी बलर थिए।

तर‚ चार दिनपछि तस्वीर पूर्ण रूपमा बदलियो। बंगलादेशले अस्ट्रेलियालाई उसकै भूमिमा पराजित गर्दै आफ्नो टेस्ट इतिहासकै सबैभन्दा ठूलो उपलब्धि हासिल गर्‍यो। यो जित कुनै एक खेलाडीको चमत्कारी स्पेल वा भाग्यशाली एक सत्रको परिणाम थिएन। बंगलादेशले हरेक सत्रमा दबाब कायम राख्दै दिनपछि दिन उत्कृष्ट प्रदर्शन गरेर कठिन जित हात पारेको हो।

हसनको सानदार सुरुआत

हसन महमुदले करिअरकै उत्कृष्ट प्रदर्शन गर्दै ५५ रन दिएर ६ विकेट लिएपछि बंगलादेशको बलिङ आक्रमणले अस्ट्रेलियालाई १९८ रनमै समेट्यो।

तस्किन अहमद र इबादत हुसेनले दुई–दुई विकेट लिए। अस्ट्रेलियाका सबै १० विकेट बंगलादेशका तीव्र गतिका बलरहरूले लिए।

त्यसपछि तान्जिद हसन र मोमिनुल हकले ब्याटिङ सम्हाल्दै दिनको अन्त्यसम्म बंगलादेशलाई ९६ रनमा एक विकेटको स्थितिमा पुर्‍याए। पहिलो दिनमै बंगलादेशले खेलमा आफ्नो नियन्त्रण स्थापित गरिसकेको थियो।

दोस्रो दिन तान्जिद हसनले संयमित ब्याटिङ गर्दै आफ्नो करिअरको पहिलो टेस्ट शतक पूरा गरे। उनी अस्ट्रेलियाको भूमिमा टेस्ट शतक बनाउने पहिलो बंगलादेशी ब्याटर बने।

उनको १०१ रनमा मोमिनुल हक र नजमुल हुसेन शान्तोको महत्त्वपूर्ण योगदान पनि जोडियो। बंगलादेश दिनको अन्त्यमा ३५१ रनमा ६ विकेटको अवस्थामा पुग्यो।

यससँगै बंगलादेशले १५३ रनको अग्रता लिँदै ऐतिहासिक जिततर्फ अर्को ठूलो कदम चाल्यो।

तेस्रो दिन मेहिदी हसन मिराजले ६५ रन बनाएपछि बंगलादेशको पहिलो इनिङ्स ४२६ रनमा समाप्त भयो। यससँगै टोलीले अस्ट्रेलियामाथि २२८ रनको विशाल अग्रता हासिल गर्‍यो।

अस्ट्रेलियाले क्यामरन ग्रीन र एलेक्स केरीमार्फत खेलमा फर्किने प्रयास गर्‍यो। तर‚ बंगलादेशका बलरहरूले दबाब कायमै राखे। दिनको खेल सकिँदा अस्ट्रेलिया १६१ रनमा चार विकेट गुमाइसकेको थियो र अझै ६७ रनले पछाडि थियो। इतिहास नजिक देखिन थाले पनि बंगलादेशको काम भने अझै पूरा भएको थिएन।

चौथो दिन मेहिदी हसन मिराजले पाँच विकेट पूरा गर्दै अस्ट्रेलियाको दोस्रो इनिङ्स २८४ रनमा समाप्त गराए। क्यामरन ग्रीनले १०४ रन बनाएर घरेलु टोलीलाई आशा दिलाएका थिए, तर बंगलादेशका बलरहरूले तल्लो क्रमका ब्याटरलाई लामो समय टिक्न दिएनन्।

बंगलादेशले जितका लागि ५७ रनको लक्ष्य पायो। तान्जिद सुरुमै आउट भए पनि शादमान इस्लाम र मोमिनुल हकले धैर्यपूर्वक ब्याटिङ गर्दै टोलीलाई लक्ष्यतर्फ अघि बढाए। अन्ततः मोमिनुल हकले विजयी चौका प्रहार गरेसँगै बंगलादेशले अस्ट्रेलियालाई उसकै भूमिमा पहिलो पटक टेस्टमा पराजित गर्‍यो।