केन भन्छन् - इंग्ल्यान्ड अझै अर्को स्तरमा पुग्न सक्छ

काठमाडौं। इंग्ल्यान्डका कप्तान ह्यारी केनले आफ्नो टोली अझै उच्च स्तरको प्रदर्शन गर्न सक्षम रहेको बताएका छन्। सन् १९६६ पछि पहिलोपटक विश्वकप जित्ने लक्ष्यमा रहेको इंग्ल्यान्डले सेमिफाइनलमा अर्जेन्टिनाको सामना गर्दैछ।

शनिबार भएको क्वार्टरफाइनलमा इंग्ल्यान्डले नर्वेलाई अतिरिक्त समयमा २–१ ले पराजित गर्दै अन्तिम चारमा स्थान बनाएको थियो। इंग्ल्यान्ड र अर्जेन्टिनाबीचको सेमिफाइनल बुधबार एटलान्टामा हुनेछ।

क्वार्टरफाइनलपछि इंग्ल्यान्डका मुख्य प्रशिक्षक थोमस टुखेलले टोलीको प्रदर्शनप्रति असन्तुष्टि जनाएका थिए। उनले इंग्ल्यान्ड भाग्यमानी बनेको, खेलमा लापरवाही गरेको, धेरै प्राविधिक गल्ती गरेको तथा आवश्यक गतिमा खेल्न नसकेको बताएका थिए।

प्रतियोगितामा ६ गोल गरिसकेका ३२ वर्षीय केन इंग्ल्यान्डका लागि जुड बेलिङ्घमसँगै संयुक्त रूपमा सर्वाधिक गोलकर्ता हुन्।

केनका अनुसार प्रशिक्षक टुखेलले प्रशिक्षणमा देखाएको स्तर खेलमा प्रस्तुत नभएको कारण असन्तुष्टि जनाएका हुन्।

‘उहाँले हामीलाई प्रशिक्षणमा देख्नुहुन्छ। टोलीको एकता, हाम्रो क्षमता, आक्रमण गर्ने शैली, एकविरुद्ध एकको खेल र खेलाडीहरूको कौशल उहाँलाई थाहा छ,’ केनले भने, ‘उहाँ मैदानमा पनि त्यही संस्करणको इंग्ल्यान्ड देख्न चाहनुहुन्छ।’

केनले बलिया विपक्षीविरुद्ध प्रशिक्षणकै जस्तो खेल प्रस्तुत गर्न सधैं सहज नहुने पनि स्वीकार गरे।

‘हामीले राम्रो विपक्षी र उत्कृष्ट टोलीहरूविरुद्ध खेलिरहेका छौं। प्रशिक्षकले हामीभित्रको उत्कृष्ट प्रदर्शन निकाल्न खोजिरहनुभएको छ र हामीलाई पनि थाहा छ कि हामी अझै अर्को स्तरमा पुग्न सक्छौं,’ उनले भने।

इंग्ल्यान्डले प्रतियोगिताका केही चरणमा मात्र आफ्नो पूर्ण क्षमता देखाएको केनको भनाइ छ। नर्वेविरुद्ध पनि केही समयमा राम्रो प्रदर्शन भए पनि टोलीले चाहेको जस्तो खेलमाथि पूर्ण नियन्त्रण कायम गर्न नसकेको उनले बताए।

‘हामीले त्यो स्तरको प्रदर्शन अझै पूर्ण रूपमा देखाएका छैनौं। केही झलक भने देखाएका छौं। नर्वेविरुद्ध पनि केही समय त्यस्तो प्रदर्शन भयो,’ केनले भने, ‘तर हामीले चाहेजस्तो पूर्ण नियन्त्रण कायम गर्न सकेका छैनौं। मलाई लाग्छ, हामी त्यो गर्न सक्छौं।’

सेमिफाइनलमा विश्वकै उत्कृष्ट टोलीमध्ये एक अर्जेन्टिनाविरुद्ध खेल्नुपर्ने भए पनि सुधार गर्ने ठाउँ बाँकी रहँदै अन्तिम चारमा पुग्नु सकारात्मक पक्ष भएको केनले बताए।

‘सबैभन्दा खुसीको कुरा हामी सेमिफाइनलमा छौं र अझै सुधार गर्न सक्छौं भन्ने महसुस भइरहेको छ,’ उनले भने, ‘तर यसलाई लिएर अत्यधिक चिन्ता लिनुपर्ने अवस्था छैन। हामीले धेरै राम्रा पक्ष पनि देखाइरहेका छौं।’