फुटबल जगत रुने रात!

मैदानमा अन्तिम सिटी बज्नेबित्तिकै एउटा टोली जितको उत्सवमा रमाउनेछ भने अर्को टोलीको विश्वकप यात्रा टुंगिनेछ।

तर‚ शुक्रबारको खेल जित वा हारको कथा मात्र होइन। फुटबल जगत् सम्भवतः आफ्ना दुई महान् हस्तीमध्ये एकलाई राष्ट्रिय टोलीको जर्सीमा अन्तिमपटक हेर्ने क्षणको संघारमा उभिएको छ।

पोर्चुगलका कप्तान क्रिस्टियानो रोनाल्डो वा क्रोएसियाका कप्तान लुका मोड्रिचमध्ये एकको विश्वकप यात्रा समाप्त हुने निश्चित छ। त्यसैले यो खेल अन्तिम ३२ को प्रतिस्पर्धा मात्र होइन, दुई युगका महान् खेलाडीमध्ये एकको अन्तर्राष्ट्रिय यात्राको भावनात्मक अध्याय पनि बन्न सक्छ।

४१ वर्षीय रोनाल्डो र ४० वर्षनजिक पुगेका मोड्रिच दुवै आफ्नो करिअरको अन्तिम चरणमा छन्। यी दुईले रियल मड्रिडमा एउटै ड्रेसिङ रुम सेयर गर्दै युरोपेली फुटबलमा स्वर्णिम इतिहास रचे।

सन् २०१२ देखि २०१८ सम्म उनीहरूले स्पेनिस क्लबका लागि २२२ खेल खेल्दै १३ उपाधि जिते। यस अवधिमा टोलीले चार पटक यूईएफए च्याम्पियन्स लिग, दुई–दुई पटक ला लिगा र कोपा डेल रे तथा तीन–तीन पटक फिफा क्लब विश्वकप जितेको थियो।

रोनाल्डोले पोर्चुगललाई युरो च्याम्पियन बनाइसकेका छन्। अब उनी विश्वकपको उपाधिसहित आफ्नो गौरवपूर्ण अन्तर्राष्ट्रिय करिअरलाई पूर्णता दिन चाहन्छन्।

अर्कोतर्फ मोड्रिचले सानो राष्ट्र क्रोएसियालाई २०१८ विश्वकपको फाइनलसम्म पुर्‍याएर इतिहास रचेका थिए। उनी पनि आफ्नो देशलाई फेरि एकपटक ठूलो सफलताको नजिक पुर्‍याउने लक्ष्यसहित मैदान उत्रिनेछन्।

तर‚ विश्वकपको नकआउट चरणमा भावनाका लागि ठाउँ हुँदैन। यहाँ एउटा टोली अगाडि बढ्छ भने अर्को टोलीको यात्रा त्यहीँ समाप्त हुन्छ। त्यसैले आजको खेलपछि यी दुई महान् फुटबलरमध्ये एकको विश्वकप सपना अन्त्य हुनेछ।

अन्तिम सिटीपछि हार्ने खेलाडीको आँखाबाट झर्ने आँसु व्यक्तिगत पीडाको प्रतीक हुने छैन, त्यो क्षणले विश्वभरका करोडौं फुटबल समर्थकलाई भावुक बनाउनेछ।

टेलिभिजनका पर्दादेखि रंगशालाको दर्शकदीर्घासम्म सबैको ध्यान स्कोरबोर्डभन्दा पनि दुई महान् खेलाडीको अनुहारमा केन्द्रित हुनेछ।

विश्वकप फुटबलको सबैभन्दा कठोर सत्य यही हो। यसले दुवैलाई सँगै अगाडि बढ्ने अवसर दिँदैन। त्यसैले आजको रात एउटा टोलीको जितको कथा होइन, फुटबल इतिहासका एक महान् अध्यायको सम्भावित अन्त्यको रात पनि हुन सक्छ।