नेपाल ‘ए’ र स्कटल्यान्डबीचको खेलमा वर्षा बाधक

काठमाडौं। नेपाल ‘ए’ र स्कटल्यान्डबीचको एकदिवसीय सिरिज वर्षाका कारण प्रभावित भएको छ।

मूलपानी क्रिकेट मैदानमा नेपालले पहिला ब्याटिङ थालेको थियो। ३७ ओभरको समाप्तिमा नेपालले ३ विकेट गुमाएर १६३ रन बनाएको छ।

तर, वर्षा सुरु भएपछि खेल यतिकैमा रोकिएको छ। नेपालका मयन यादव ४५ रन बनाएर आउट भइसकेका छन्।

उनले ८६ बलमा ५ चौका र १ छक्का प्रहार गरे। उनले कप्तान अनिलकुमार साहसँग पहिलो विकेटका लागि ५६ रनको साझेदारी गरेका थिए।

अनिले ३८ बलमा २ चौकासहित १८ रन बनाए। अहिले देव खनाल ४९ रनसहित अविजित छन्। उनले ५६ बलमा ४ चौका र १ छक्का प्रहार गरेका छन्।

सन्दीप जोरा ३४ रनमा आउट हुँदा सिनियर टोलीबाट ‘ड्रप’ भएका कुशल मल्ल २ रनमा खेलिरहेका छन्।

स्कटल्यान्डका ओलिभर डेभिडसन, ब्रान्डन म्याकमुलन र मार्क वार्टले समान १ विकेट झारेका छन्।