गुल्शन चम्किएसँगै ओमानमाथि नेपालको बदला

काठमाडौं। गुल्शनकुमार झाको कसिलो बलिङसँगै आईसीसी क्रिकेट विश्वकप लिग २ मा नेपालले ओमानसँग बदला पूरा गरेको छ।

मंगलबार सम्पन्न खेलमा नेपालले ८१ रनको विशाल जित निकालेको हो। यो जितसँगै पहिलो खेलमा बेहोरेको १०२ रनको (डीएलएस मेथड)को समेत नेपालले बदला लिएको छ।

जितसँगै नेपालले २४ खेलबाट १८ अंक पुर्‍याएको छ। यद्यपि, नेपाल सातौं स्थानमा यथावत् छ। चार खेल बढी खेलेको ओमान भने ३१ अंकसहित तेस्रो स्थानमा यथावत् छ।

नेपालले दिएको २५७ रनको लक्ष्य पछ्याएको ओमानले ३९.५ ओभरमा सबै विकेट गुमाउँदै १७५ रन बनाएको हो।

ओमानका विनायक सुकलाले सर्वाधिक ३६ रन बनाए। ४१ बल खेलेका उनले ३ चौका र २ छक्का प्रहार गरे। हम्माद मिर्जा ३४, हसनैन उल वहाब २९, हसनैन शाह १४ रनमा आउट हुँदा नदीम खान र जतिन्दर सिंहले समान १२ रनको योगदान दिए।

नेपालका गुल्शनकुमार झाले सर्वाधिक ५ विके६ लिए। ९ ओभर बलिङ गरेका उनले ३८ रन खर्चिए।

करण केसी, नन्दन यादव, सन्दीप लामिछाने र दीपेन्द्रसिंह ऐरीले समान १ विकेट लिए।

त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ थालेको नेपालले अन्तिम २ बल बाँकी रहँदा सबै विकेट गुमाएर २५६ रन बनाएको थियो।

नेपालका ओपनर आसिफ शेखले सर्वाधिक ९४ रन बनाए। ९७ बल खेलेका उनले ७ चौका प्रहार गरे। उनी र अर्जुन कुमालले दोस्रो विकेटका लागि १२३ रनको विशाल साझेदारी गरेका थिए।

अर्जुनले भने ८७ बलमा ४ चौकासहित ४८ रन बनाए। दीपेन्द्रसिंह ऐरी ३३ र गुल्शनकुमार झा १७ रनमा आउट हुँदा आरिफ शेखले अन्तिममा आएर आक्रमक इनिङ्स खेले।

उनले २४ बलमा १ चौका र ४ छक्कासहित ४३ रन बनाए। ओमानका नदीम खानले सर्वाधिक ३ विकेट लिए। १० ओभर बलिङ गरेका उनले ४१ रन खर्चिए।

शकिल अहमेद र हशन शाहले समान २ विकेट राखे।