सपना र सनम च्याम्पियन

गोरखा। मनकामना मन्दिरदेखि गोरखा दरबार म्याराथनको उपाधि सपना गुरुङ र सनम गुरुङले जितेका छन्।

जिल्ला खेलकुद विकास समिति गोरखाको आयोजनामा र गण्डकी प्रदेश खेलकुद परिषदको सहयोगमा मनकामना मन्दिरदेखि गोरखा दरबारसम्म भएको म्याराथनमा सपना महिलातर्फ र सनम पुरुषतर्फ विजयी भएका हुन्। दुवैले समान ५५ हजार रुपैयाँ हात पारे।

निर्धारित ४२ किलोमिटर म्याराथन कास्कीकी सपनाले ४ घण्टा ५१ मिनेट १० सेकेन्डमा दूरी पूरा गरिन्।

त्यस्तै, तनहुँकी बिबिका कुमाल दोस्रो स्थानमा रहिन्। उनले ४ घण्टा ५९ मिनेट १३ सेकेन्डमा दौड पूरा गरिन्। नवलपुरकी डोलमाया महतो तेस्रो स्थानमा रहँदा उनले ५ घण्टा २७ मिनेट २९ सेकेन्ड समय लिइन्।

यसैगरी, नवलपुरकै सूर्य कुमारी महतो चौथो स्थानमा रहिन्। पुरुषतर्फको म्याराथनमा सनमले २ घण्टा ५९ मिनेट ०० सेकेन्डमा दूरी पूरा गर्दै पहिलो स्थान हासिल गरेका हुन्।

कास्कीका सफल लामा दोस्रो स्थानमा रहे। उनले ३ घण्टा १० मिनेट २५ सेकेन्डमा दौड पूरा गरे। त्यस्तै, कास्कीका चेतनाथ चालिसे ३ घण्टा ८० मिनेटसहित तेस्रो स्थानमा रहे।

यसैगरी, पर्वतका सन्तोष परियार चौथो र गोरखाका अञ्जन पौडेल पाँचौँ स्थानमा रहे। ५ किलोमिटर पुरुषतर्फ सरोज गिरिले १७ मिनेट २० सेकेन्ड समय निकाल्दै पहिलो स्थान हासिल गरे। त्यसैगरी कमल बिक दोस्रो, सक्ष्यम बोहोरा तेस्रो, सगुन लामिछाने चौथो र प्रकाश महतो पाँचौँ स्थानमा रहे।

महिलातर्फ मैनकुमार लामा पहिलो स्थानमा रहिन्। शिमरन थापा दोस्रो, विमला माया मानन्धर तेस्रो, रोजिना थापा मगर चौथो र अञ्जिला जिसी पाँचौँ स्थानमा रहिन्।

१० किलोमिटर

१० किलोमिटर पुरुषतर्फ बादल कार्कीले उत्कृष्ट प्रदर्शन गर्दै पहिलो स्थान हासिल गरे। आदित्य जिसी दोस्रो, साबिन सापकोटा तेस्रो, समीर नेपाली चौथो र राकेश बिक पाँचौँ स्थानमा रहे।

महिलातर्फ प्रकृति भुजेल (नवलपुर) ले पहिलो स्थान जितिन्। राधा माया दराई दोस्रो, निरुता गुरुङ तेस्रो, दिपिका महतो चौथो र अलिना नेपाली पाँचौँ स्थानमा रहिन्।