‘लिग त गराउन सकेको छैन, खेलाडीको उपचारमा मद्दत त गर’

काठमाडौं। अखिल नेपाल फुटबल संघ (एन्फा)ले राष्ट्रिय महिला फुटबल टोलीकी कप्तान सावित्रा भण्डारी ‘साम्बा’ को उपचार गर्न हात पठाएपछि विरोध प्रदर्शन भएको छ।

सातदोबाटोस्थित एन्फा कम्प्लेक्समा मंगलबार राष्ट्रिय टोलीमा डिफेन्सिभ मिडफिल्डर रोहित चन्दसहित पूर्वखेलाडी विक्रम लामा, विराज महर्जनलगायतले पम्पलेट बोकेर विरोध प्रदर्शन गरेका हुन्। खेलाडीहरूले मैदानको सामान्य पारापिटमा बसेर विरोध प्रदर्शन गरेका हुन्।

विरोध प्रदर्शन गरिरहँदा मैदानभित्र भने राष्ट्रिय लिगमा विभागीय टोली त्रिभुवन आर्मी क्लब र चर्च ब्वाइज युनाइटेड भिडिरहेका थिए।

उनीहरूले खेल खेल्ने खेलाडी नरहे तिमी कसरी रहन्छौं एन्फा ?, एन्फा झूटको खेती कहिलेसम्म?, लिग त गराउन सकेको छैन, खेलाडीको उपचारमा मद्दत त गर, सावित्रा भण्डारी नेपाली नै हुनलगायतका नारा बोकेका पम्पलेट देखाएर विरोध गरेका थिए।

न्युजिल्यान्डको वेलिङ्टन फिनिक्स फुटबल क्लबबाट अस्ट्रेलियाको निन्जा ‘ए’ लिग खेल्ने क्रममासाम्बा गत पुस तेस्रो साता घाइते भएकी थिइन्। उनी ब्रिस्बेन रोअरविरूद्धको खेलका क्रममा विपक्षी टोलीकी गोलकिपरसँग ठोक्किएकी हुनन्।

उनको दाहिने घुँडाको एसीएल पूर्ण रूपमा च्यातिएको छ। सिजनका सबै खेल गुमाएकी उनलाई यो चोट निको भएर पुन: मैदानमा फर्कन कम्तीमा ९ देखि १२ महिना लाग्नेछ।

तर, दुई महिनासम्म पनि उपचार नभएपछि साम्बाले सामाजिक सञ्जालमार्फत एन्फाले कतारस्थित एस्पटर हस्पिटलमा उपचार गर्न जान सहयोग नगरेको भन्दै समर्थकसँग आर्थिक रकम जुटाइदिन अपिल गरेकी थिइन्।

एन्फाले सोमबार नै विज्ञप्ति निकालेर पत्रचार गरेको जनाएको थियो। तर, साम्बाले आफ्नो पोस्टपछि प्रीति राई र रेनुका नगरकोटेलगायत खेलाडीहरूको उपचार गरिएको उल्लेख गर्दै आफ्नो उपचारमा भने बेवास्ता गरिएको गुनासो गरिन्।

साम्बाले आफ्नो उपचारका लागि कुल ८० हजार अमेरिकी डलर खर्च लाग्ने उल्लेख गरेकी छन्।