साम्बा भन्छिन्– एन्फाले ५ लाख दिन्छु, अन्य रकम आफैं मिलाउनु भन्यो

काठमाडौं। नेपाली महिला राष्ट्रिय फुटबल टोलीकी कप्तान सावित्रा भण्डारी ‘साम्बा’ले घुँडा चोटका कारण पुनः जटिल शल्यक्रिया गर्नुपर्ने अवस्था आएको बताउँदै उपचारका लागि आर्थिक सहयोगको अपिल गरेकी छन्।

न्युजिल्यान्डको वेलिङ्टन फिनिक्स फुटबल क्लबबाट खेल्दा उनले चोट बोकेकी थिइन्। पछिल्लो सात हप्तादेखि मैदान बाहिर रहेकी उनले आफ्नो घुँडाको एसीएलमा यसअघि गरिएको शल्यक्रियाबाट हालिएको ग्राफ्ट र एमसिएल दुवैमा गम्भीर समस्या देखिएको जानकारी दिएकी छन्। चिकित्सकले पुनः जटिल शल्यक्रिया गर्नुपर्ने सुझाव दिएका छन्।

यसअघि साम्बाले यही चोटको उपचारमा कतारमा गराएकी थिइन्। त्यतिखेर अखिल नेपाल फुटबल संघ (एन्फा)बाट पूर्ण व्यवस्थापन र सहयोग प्राप्त भएको थियो। तर, यसपटक भने वाचा अनुसार सहयोग नपाएको गुनासो गरेकी छन्।

‘क्लबको पहलमा चोट लागेको तीन सातापछि शल्यक्रियाको मिति तय गरिएको छ। त्यतिखेर एन्फाले आफ्नो तर्फबाट पहल गर्ने बताएको थियो। यद्यपि, प्रक्रिया अघि नबढ्दा उपचारमा ढिलाइ भएको छ,’ उनले भनेकी छन्।

अघिल्लो साता एन्फा अध्यक्ष पंकजविक्रम नेम्वाङले प्रशासनिक सहयोग गर्न नसकिने जानकारी दिँदै पाँच लाख रुपैयाँसम्म नगद सहयोग गर्ने प्रस्ताव राखेको उनले जिकिर गरेकी छन्। अन्य प्रक्रिया आफैं मिलाउनुपर्ने बताएको साम्बाको भनाइ छ। यसका कारण करिब दुई महिना ढिलाइ भएको र पुनः शल्यक्रियाको मिति मिलाउनुपर्ने अवस्था आएको उनले उल्लेख गरेकी छन्।

अस्पेटारमै उपचार गराउने इच्छा

हाल उनी आबद्ध क्लबले न्युजिल्यान्डकै स्थानीय अस्पतालमा उपचार गराउन तयार रहेको जनाएको छ। तर चोट गम्भीर रहेको र यसअघि कतारस्थित अस्पेटारमा उच्चस्तरीय उपचार पाएको अनुभवका आधारमा पुनः सोही अस्पतालमा उपचार गराउने इच्छा उनको छ।

क्लबले बीमाबाट प्राप्त रकम निकासा गरिदिने भए पनि शल्यक्रिया र ७–८ महिनाको रिह्याबका लागि आवश्यक सम्पूर्ण खर्च नपुग्ने भएकाले आम समर्थकसमक्ष सहयोगको अपिल गरिएको उनको भनाइ छ। प्रारम्भिक अनुमान अनुसार उपचारका लागि करिब ८० हजार अमेरिकी डलर आवश्यक पर्ने बताइएको छ।

‘म विदेशमा रहेकाले सरकारसमक्ष पनि प्रतिनिधित्व गर्दै सहयोगको प्रयास भएको छ। तर, प्रक्रिया अपेक्षा अनुसार अघि बढेको छैन। शल्यक्रिया नगरी बस्ने विकल्प नभएकाले समयमै उपचार आवश्यक रहेको छ,’ उनले भनेकी छन्।