जनजागृतिमाथि एपीएफको सहज जित

काठमाडौं। विभागीय टोली एफपीएफले राष्ट्रिय लिगमा नव जनजागृति युवा क्लबसँग सहज जित निकालेको छ।

सादोबाटोस्थित एन्फा कम्प्लेक्समा आइतबार सम्पन्न खेलमा एपीएफले ४–१ को हासिल गरेको हो। लिगमा जनजागृतिको लगातार छैटौं हार हो। भने एपिएफको पाँचौं जित हो।

यो जितसँगै एपीएफले ६ खेल खेल्दै १६ अंक जोडेको छ। जनजागृति अंकविहीन बन्दै तालिकाको पुच्छरमा छ। एपीएफले सुरुआतदेखि नै आक्रमण खेलेको थियो। खेलको आठौं मिनेटमा एपीएफका प्रदीप तामाङको सर्टमा मणिकुमार लामाले प्रहार गरेको गोलले लक्ष्य लिन सकेन।

त्यस्तै, २०औं मिनेटमा एपीएफका युवराज थापाले दिएको पासलाई बुद्धिमान राईले गोल गर्न सकेनन्। २९ औं मिनेटमा निश्चल थापाले गोल गर्दै जनजागृतिलाई सुरुआती अग्रता दिलाए। तर, जनजागृतिको अग्रता लामो समय टिक्न सकेन।

४३औं मिनेटमा कप्तान हरि कार्कीले उत्कृष्ट गोल गर्दै एफपीएफलाई १–१ को बराबरीमा ल्याए। ४६औं मिनेटमा युवराजको गोलमा एपीएफ २–१ ले अघि रह्यो।

५९औं मिनेटमा समिराज थोकरले गोल गर्दै एपीएफ ३–१ को स्थिति ल्याए। यसको तीन मिनेटपछि अनिश घर्ती क्षेत्रीले गोल गर्दै एपीएफलाई सहज जित दिलाए।