एनपीएलमा सट्टेबाजी मौलाउँदै

काठमाडौं। नेपाल प्रिमियर लिग (एनपीएल) दोस्रो संस्करण सुरु भएको एक साता नहुँदै सट्टेबाजीसँग जोडिएका गतिविधि सतहमा आउन थालेका छन्।

खेलाडीलाई आर्थिक प्रलोभन देखाइ खेलको नतिजामा प्रभाव पार्ने उद्देश्यका साथ दुई व्यक्तिले गरेको कोशिशपछि प्रहरी नियन्त्रणमा लिएको छ। यसले यसपटकको लिगमा बेटिङको जोखिम झनै गम्भीर तरिकाले मौलाउँदै गएको स्पष्ट पार्छ।

नेपाल क्रिकेट संघ (क्यान) ले शंका लाग्दो गतिविधि देखिएको जानकारी प्रहरीलाई दिएपछि विशेष निगरानी थालेको थियो। यही क्रममा मंगलबार लाजिम्पाट क्षेत्रबाट भारतको हरियाणा निवासी २८ वर्षीय दिलप्रित सिंह र बर्दिया घर भई हाल चण्डिगढ बस्ने २४ वर्षीया रेविका सिंहठकुरी पक्राउ प्रहरीले पक्राउ गरेको हो।

प्रहरीका अनुसार उनीहरूले ह्वाट्सएप र इन्स्टाग्राममार्फत खेलाडीहरूलाई ‘स्पोन्सर गर्छौं’ भन्ने खेलमा निर्धारित ढंगले प्रदर्शन गराएवापत रकम उपलब्ध गराउने प्रस्ताव गरेका थिए।

प्रारम्भिक अनुसन्धानमा उनीहरूको उद्देश्य खेलाडीलाई प्रभावित पारेर एनपीएलको खेलमा अनधिकृत रूपमा सट्टेबाजीका नतिजा मिलाइदिने रहेको पुष्टि भएको हो।

अन्तर्राष्ट्रिय स्तरका युवा क्रिकेटर सम्मिलित यस प्रतियोगितामा यसरी सिधै खेलाडीलाई लक्ष्य बनाएर गरिएको प्रयासले लिगको निष्पक्षता र विश्वसनीयतामाथि गम्भीर प्रश्न खडा गरेको छ।

काठमाडौं उपत्यका अपराध अनुसन्धान कार्यालयका अनुसार पक्राउ परेकामाथि सट्टेबाजी प्रवर्द्धन तथा खेलमा अनधिकृत प्रभाव पार्ने प्रयाससम्बन्धी मुद्दामा अनुसन्धान अघि बढाइएको छ। उनीहरूलाई थप अनुसन्धानका लागि जिल्ला प्रहरी परिसर, भद्रकालीमा बुझाइएको छ।

२७ मंसिरसम्म चल्ने एनपीएलमा सरोगेट विज्ञापनदेखि प्रत्यक्ष प्रलोभनमार्फत खेल बिगार्ने जोखिम बढ्दै जाँदा यसपटकको संस्करणलाई सबैभन्दा संवेदनशील मान्नुपर्ने अवस्था आएको विश्लेषकहरूको टिप्पणी छ।