अन्डरडग भर्सेस पावरहाउस

विश्वास थापा, शारजाह। नेपाली क्रिकेटको यात्रामा शनिबार ऐतिहासिक अध्याय थपिँदैछ।

पहिलोपल्ट नेपालले टी–२० क्रिकेटका महाशक्ति वेस्ट इन्डिजसँग तीन खेलको अन्तर्राष्ट्रिय सिरिज खेल्दैछ। झन्डै तीन दशक लामो अन्तर्राष्ट्रिय यात्रामा नेपालले कुनै टेस्ट राष्ट्रसँग खेलेको यो पहिलो द्विपक्षीय सिरिज हुने भएकाले यसलाई माइलस्टोनको रूपमा लिइएको छ।

गत वर्ष अमेरिका र वेस्ट इन्डिजमा सम्पन्न अघिल्लो संस्करणको टी–२० विश्वकपमा देखाएको प्रदर्शनपछि नेपाल क्रिकेटले अन्तर्राष्ट्रिय स्तरमा सबैको ध्यान खिच्न सफल भएको थियो। त्यसैले युएईको शारजाह अन्तर्राष्ट्रिय क्रिकेट रंगशालामा हुने यो तीन खेलको सिरिजले पनि विश्व क्रिकेट समुदायको ध्यान पुन: एकपल्ट खिच्ने अपेक्षा गरिएको छ।

नेपाल क्रिकेट संघ (क्यान) सचिव पारस खड्का भन्छन्, ‘शारजाह एउटा आइकोनिक भेन्यु हो, जहाँ नेपालले विगतमा पनि फरक–फरक प्रतियोगितामा आफ्नो उपस्थिति जनाएको छ। यो सिरिज हामीलाई उदाउँदो राष्ट्रको रूपमा विश्वलाई आफ्नो क्षमता देखाउने अवसर दिनेछ।’

नेपालले अहिलेसम्म ८ पटक मात्र टेस्ट राष्ट्रसँग टी–२० आई खेल खेलेको छ। यस क्रममा नेपालले बंगलादेश, आयरल्यान्ड र जिम्बाबेसँग समान दुई–दुई पटक तथा भारत र दक्षिण अफ्रिकासँग एक–एक पटक प्रतिस्पर्धा गरेको छ। पटक–पटक जितको संघारमा पुगेर पनि नेपालले अहिलेसम्म नतिजा आफ्नो पक्षमा पार्न सकेको छैन। यस सिरिजमा नेपाल टेस्ट राष्ट्रलाई पराजित गर्दै नयाँ इतिहास रच्ने दाउमा छ, जसले भविष्यमा अझ धेरै अवसरका ढोका खोल्न सक्छ।

कप्तान रोहित पौडेल पनि यसैमा आशावादी देखिन्छन्। उनी भन्छन्,‘यो सिरिजपछि धेरै अवसर खुल्छ भन्ने लाग्छ। टेस्ट राष्ट्रसँगको यो पहिलो द्विपक्षीय सिरिज हाम्रो लागि ऐतिहासिक हो। यसपछि पनि यस्ता सिरिज खेल्ने सम्भावना बढ्छ। नतिजा हाम्रो लागि निकै महत्वपूर्ण छ, किनकि यसले विश्व क्रिकेटमा हाम्रो छाप छोड्नेछ।’

नेपालका लागि यो सिरिज आगामी टी–२० विश्वकप छनोटको अन्तिम तयारी पनि हो। आगामी महिना ओमानमा हुने एसिया छनोट अघि दुई पटकका विश्व विजेता वेस्ट इन्डिजसँग खेल्नु आफैंमा ठूलो अनुभव हो। वेस्ट इन्डिजको टोलीमा कप्तान अकिल होसिनसँगै जेसन होल्डर, काइल मेयर्स, फाबियन एलन र ओबेड म्याकोयजस्ता स्टार खेलाडी छन्।

वेस्ट इन्डिज क्रिकेटमा विशेषगरी टी–२० ढाँचामा ‘पावरहाउस’ मानिन्छ। उसको आक्रामक ब्याटिङ शैली कै कारण विश्वका प्रायः सबै टी–२० लिगमा क्यारिबियन खेलाडीको वर्चस्व देखिन्छ। वेस्ट इन्डिजले सन् २०१२ र २०१६ मा दुई पटक टी–२० विश्वकप उपाधि जितिसकेको छ। नेपालले भने अहिलेसम्म सन् २०१४ र २०२४ मा मात्रै टी–२० विश्वकपमा सहभागिता जनाउन सकेको छ।

नेपाल अहिले विश्व क्रिकेटमा ‘अन्डरडग’ को रूपमा उदाउँदै गरेको एसोसिएट राष्ट्र हो। वेस्ट इन्डिज टी–२० क्रिकेटको अनुभवी ‘पावरहाउस’ हो। त्यसैले यो सिरिजलाई सबैले ‘अन्डरडग भर्सेस पावरहाउस’को रोमाञ्चक भिडन्तका रूपमा हेरिरहेका छन्।

यद्यपि, वेस्ट इन्डिजसँग नेपालको यो पहिलो भेट भने होइन। सन् २०२३ मा जिम्बाबेमा भएको आइसीसी एकदिवसीय विश्वकप छनोटमा यी दुई टोली पहिलो पटक आमनेसामने भएका थिए, जहाँ नेपाल १०१ रनले पराजित भएको थियो। त्यसपछि गत वर्ष नेपालले घरेलु मैदानमा वेस्ट इन्डिज ‘ए’ टिमसँग पाँच टी–२० खेलको सिरिज खेलेको थियो।

कीर्तिपुरस्थित त्रिवि क्रिकेट मैदानमा घरेलु समर्थकबीच पहिलो खेलमा कप्तान रोहित पौडेलको शतकीय इनिङ्ससँगै नेपालले शानदार जित निकालेको थियो। तर, सिरिजमा भने नेपाल ३–२ ले पराजित भयो।

यसपटक भने चुनौती अझ ठूलो छ। अनुभवी र आक्रामक वेस्ट इन्डिजविरुद्ध नेपालले आफ्नो योजना र आत्मविश्वास देखाउनुपर्नेछ। तर, इतिहासले पनि भन्छ—हर एक ‘अन्डरडग’सँग ‘पावरहाउस’लाई चकित पार्ने क्षमता हुन्छ। त्यसैले शारजाहमा आज कुन कथा लेखिनेछ त्यो खेलपछि नै देखिनेछ।