विवादबीच २०औं एसियन गेम्समा नेपालको सहभागिता: ३२ खेलमा ४३४ खेलाडीको नाम दर्ता

काठमाडौं। आगामी वर्ष जापानमा हुने २०औं एसियन गेम्सका लागि नेपालले अन्ततः ३२ खेलमार्फत ४३४ खेलाडीको नाम दर्ता गरेको छ। तर, यो प्रक्रियाले नेपाली खेलकुद निकायभित्रको द्वन्द्व र अव्यवस्थालाई पुनः सतहमा ल्याइदिएको छ।

अध्यक्ष जीवनराम श्रेष्ठ नेतृत्वको नेपाल ओलम्पिक कमिटी (एनओसी) ले बुधबार सार्वजनिक गरेको विवरणअनुसार २३९ पुरुष र १९५ महिला खेलाडीको नाम दर्ता भएको हो। यसअघि दर्ता नगरिएका तर लोकप्रिय र पदक सम्भावना बोकेका खेलहरू फुटबल र तेक्वान्दोलाई अन्तिम समयमा समावेश गरिएको हो।

एनओसीका महासचिव राजिव श्रेष्ठका अनुसार युवा तथा खेलकुद मन्त्रालय र राष्ट्रिय खेलकुद परिषद् (राखेप) ले पटक–पटक पत्राचार गर्दा पनि कुनै ठोस जानकारी उपलब्ध गराएको थिएन। एथलेटिक्स संघले समेत जवाफ नदिँदा अन्ततः एनओसीले विगतको परम्परा हेरेर म्याराथनमा एक पुरुष र एक महिला खेलाडी आफैं दर्ता गरेको हो।

दुई सूची

यसपटक असामान्य ढंगले मन्त्रालयले छुट्टै ३१ खेलको नाम दर्ता गरेको थियो। तर, अहिले मन्त्रालय मन्त्रीविहीन छ। अन्तरिम सरकार गठन भएसँगै मन्त्रालयको जिम्मेवारी प्रधानमन्त्री सुशीला कार्की आफैंले राखेकी छन्।

पूर्वखेलकुद मन्त्री तेजुलाल चौधरीले भने धुर्वबहादुर प्रधानको नेतृत्वमा तदर्थ समिति गठन गर्दिएका थिए। यसले नेपालमा दुईवटा ओलम्पिक कमिटी अस्तित्वमा रहेको विवादलाई अझै गहिरो बनाएको छ।

एसियन गेम्सका लागि नेपालले एथलेटिक्स, आर्चरी, ब्याडमिन्टन, बास्केटबल, बक्सिङ, ब्रेकिङ एण्ड डान्स स्पोर्टस, बेसबल एण्ड सफ्टबल, राफ्टिङ एण्ड कानोइङ, कुराँस, क्रिकेट, साइक्लिङ, इ-स्पोर्टस, गल्फ, हक्की, जुडो, कबड्डी, कराते, मोडर्न पेन्टाथलन, रग्बी, स्केटिङ, स्पोर्टस क्लाइम्बिङ, स्क्वास, सफ्ट टेनिस, पौडी, टेनिस, टेबल टेनिस, भलिबल, भारतोलन, कुस्ती, उसु, फुटबल र तेक्वान्दो गरी ३२ खेलमा खेलाडी पठाइनेछ।