नेपाल कबड्डी लिगको खेलाडी दर्ता भोलिसम्म

काठमाडौं। नेपाल कबड्डी लिग (एनकेएल) सिजन २ को लागि खेलाडी दर्ता प्रक्रिया अन्तिम चरणमा पुगेको छ।

आयोजक एस्ट्रोनिक्स म्यानेजमेन्ट खेलाडी दर्ताको अन्तिम दिन सोमबारसम्म तोकेको छ। एनकेएलले स्वदेशी तथा विदेशी खेलाडीको बढ्दो उत्साहको कारण दोस्रो सिजनको लागि खेलाडी दर्ताको अवधि लम्बाएको थियो।

एस्ट्रोनिक्स म्यानेजमेन्टका प्रमुख अमितकुमार बेगानीका अनुसार काठमाडौं उपत्यका र मोफसलसँगै विदेशी खेलाडीको अत्याधिक चासो आएको छ। त्यसैले कोही पनि इच्छुक खेलाडी नछुटोस् भनेर सोमबारलाई खेलाडी दर्ताको अन्तिम दिन तोकिएको हो।

दर्ता गरिका खेलाडीलाई ड्राफ्टमार्फत् फ्रेन्चाइज टिमले लिनेछन्, जसले एनकेएलको सिजन २ मा प्रतिस्पर्धा गर्ने अवसर पाउनेछन्। खेलाडी दर्ता प्रक्रिया ८ जुलाई, २०२५ मा खुला गरिएको थियो।

सिजन २ को प्रतियोगिताको मिति पनि चाँडै सार्वजनिक गर्ने आयोजकले जनाएको छ। नेपाली कबड्डी इतिहासमै फ्रेन्चाइज टोलीको ऐतिहासिक प्रतियोगिताको रूपमा एनकेएलको सिजन १ १७–३१ जनवरी, २०२५ मा भव्यताका साथ सम्पन्न भएको थियो।

विराटनगर ब्यान्डिट्स, जनकपुर नाइट्स, काठमाडौं माभरिक्स, पोखरा लेकर्स, बुटवलको हिमालयन रेइडर्स र धनगढी वाइल्डक्याट्स गरी ६ सहरका ६ टिममा नेपालसहित, थाइल्यान्ड, बंगलादेश, श्रीलंका र केन्याका खेलाडीले प्रतिस्पर्धा गरेका थिए।

त्रिपुरेश्वरस्थित कभर्डहलमा आयोजित रोमान्चक फाइनलमा काठमाडौंलाई ४३–४१ ले पराजित गर्दै जनकपुर एनकेएल च्याम्पियन भएको थियो।