नेपाली महिला टोलीको कप्तान को?

काठमाडौं। नेपाल महिला राष्ट्रिय फुटबल टोली एएफसी महिला एसियन कप छनोटको तयारीमा जुटिरहेको छ।

लाओसविरुद्ध भोलि (असार १५ गते) हुने पहिलो खेल नेपाली समयअनुसार साँझ ६ बजे सुरु हुनेछ। तर, खेल सुरु हुनु एक दिन मात्र बाँकी हुँदा पनि नेपाली टोलीको कप्तान को हुने भन्ने स्पष्ट भइसकेको छैन। यो नेतृत्वको अन्योलले नेपाली टोलीको रणनीति र मनोबलमा असर पार्ने चर्चा चुलिएको छ।

अखिल नेपाल फुटबल संघ (एन्फा)ले प्रतियोगिता खेल्न जानुअघि गर्ने परम्परागत बिदाइ कार्यक्रममा अञ्जिला तुम्बाप्पो सुब्वा उपस्थिति नहुनुले यसपल्ट टोलीले नयाँ कप्तानीमा खेल्ने संकेत गरेको छ।

मुख्य प्रशिक्षक प्याट्रिक डी वाइल्डे, टोली व्यवस्थापक वृन्दा देवान र हेड अफ डेलिगेसन सरिला श्रेष्ठले नेपालको झन्डा समातेका थिए। तर, यसपल्ट कप्तानको रूपमा अञ्जिला अगाडि देखिइनन्, बोलाइएन पनि। यस्तो दृश्य अघिल्ला भ्रमणमा देखिएका थिएनन्।

नियमित कप्तान रेनुका नगरकोटी घाइते भएपछि सन् २०१९ देखि नेपाली टोलीको कप्तानी जिम्मेवारी अञ्जिलाले सम्हाल्दै आएकी थिइन्। त्यसयता भएका साफ महिला च्याम्पियनसिप, वाफ महिला च्याम्पियनसिप, महिला अन्तर्राष्ट्रिय प्रतियोगिता र विभिन्न मैत्रीपूर्ण खेलमा उनले नै गोलपोस्टसँगै कप्तानी जिम्मेवारी निर्वाह गरेकी हुन्। तर, पहिलोपल्ट आधिकारिक रूपमै विदेशी प्रशिक्षकको आगामनपछि कप्तानी पनि परिवर्तन हुने सम्भावनालाई नजरअन्दाज गर्न सकिन्न।

प्याट्रिक नेपाली महिला टोलीका पहिलो विदेशी प्रशिक्षक हुन्। त्यसैले उनी आफ्नो शैलीअनुसार नेतृत्वमा पनि केही फरक निर्णय लिन सक्ने अनुमान गरिएको छ। टोलीकी सबैभन्दा अनुभवी खेलाडी रेनुकालाई पुनः कप्तान बनाउने चर्चाले थप रोचक मोड लिएको छ। 

यदि मुख्य प्रशिक्षकले नयाँ कप्तान खोज्ने हो भने रेनुकाबाहेक सम्भावित दाबेदारमा सावित्रा भण्डारी ‘साम्बा’ र अनिता बस्नेत रहन्छन्। साम्बासँग अन्तर्राष्ट्रिय अनुभव प्रशस्तै छ। उनी सर्वाधिक गोलकर्तासमेत हुन्। उनले ५८ गोल गरिसकेकी छन्।

यद्यपि, कप्तानी भूमिका भने निभाएकी छैनन्। अनिता भने घरेलु फुटबलमा सफल कप्तानका रूपमा चिनिएकी छन्। विशेषगरी विभागीय टोली एपिएफ क्लबमा।

भविष्यलाई मध्यनजर गर्दै प्रशिक्षक प्याट्रिकले युवा खेलाडीलाई पनि विश्वास गर्न सक्छन्। अञ्जना रानामगर, प्रीति राई र पूजा रानामगरले उमेर समूहको टोलीहरूमा कप्तानी गरिसकेका छन्। पछिल्लो समयको उत्कृष्ट प्रदर्शन र खेल कौशलका कारण यी नामले भविष्यको दीर्घकालीन कप्तानी सम्भावना बोकेका छन्।

नेपाल छनोटको समूह ‘एफ’ मा छ। यो समूहमा आयोजक उज्बेकिस्तान, लाओस र श्रीलंका पनि छन्। समूहको विजेतामात्र अर्को चरणमा पुग्नेछ। त्यसैले नेपालका लागि प्रत्येक खेल निर्णायक हुनेछ। नेपालले दोस्रो खेल असार १८ मा श्रीलंकासँग र तेस्रो तथा अन्तिम खेल असार २१ मा घरेलु टोली उज्बेकिस्तानसँग खेल्नेछ।

कप्तानी जिम्मेवारीको अन्योलबीच नेपाली टोली मैदानमा उत्रन लागिपरेको छ। यसले टोलीको एकता र मनोबलमा कस्तो प्रभाव पार्नेछ भन्ने कुरा भने अबको प्रदर्शनले मात्र बताउनेछ।