वीर गणेशमान रन : सन्तोषी र राजन च्याम्पियन

काठमाडौं । पाँचौं संस्करणको वीर गणेशमान सिंह १० किलो मिटर दौडको उपाधि सन्तोषी श्रेष्ठ र राजन रोकायाले जितेका छन् ।

शनिबार काठमाडौंमा भएको दौडमा पुरुषतर्फ राजन र महिला स्पर्धामा सन्तोषी च्याम्पियन बनेका हुन् ।

उपाधि सहित दुवै स्पर्धाका विजेताले ६० हजार रुपैयाँ प्राप्त गरे । 

पुरुषतर्फ त्रिभुवन आर्मी क्लबका राजनले ३१ मिनेट २२ सेकेण्डमा दौड पूरा गरे। उनका सहकर्मी खड्क बहादुर खड्का ३१ मिनेट ५५ सेकेण्डमा दौड पुरा गर्दै दोस्रो भए । मुकेश बहादुर पालले ३२ मिनेट १२ सेकेण्डमा दौड पूरा गर्दै तेस्रो स्थान हासिल गरे। बागलुङका तीर्थ पुन चौथो भए भने केन्याका जुलियस मुरीउकीले पाँचौँ स्थान प्राप्त गरे।

महिलातर्फ भने राष्ट्रिय कीर्तिमानी धाविका सन्तोषी श्रेष्ठले ३८ मिनेट ३ सेकेण्डमा दौड पूरा गर्दै उपाधि जितिन्।

त्रिभुवन आर्मी क्लबकी पूर्ण लक्ष्मी न्यौपानेले ३९ मिनेट १९ सेकेण्डमा दौड पूरा गर्दै दोस्रो स्थान प्राप्त गरिन् भने एपीएफका आशा रावतले ४० मिनेट २७ सेकेण्डमा दौड पूरा गर्दै तेस्रो स्थान हासिल गरिन्। सोही क्लबकी फूलमति राना ४० मिनेट २७.०१ सेकेण्डमा दौड समाप्त गर्दै चौथो भइन्।

गणेशमान सिंह फाउन्डेसन र वीर गणेशमान सिंह स्पोर्ट्स कमिटीद्धारा आयोजित प्रतियोगितामा ५ सय धावकले दौडिएका थिए ।

विजेता खेलाडीलाई कार्यक्रमका प्रमुख अतिथी शहरी विकास मन्त्री प्रकाशमान सिंह लगायतले पुरस्कृत गरेका थिए ।