एरिकालाई हिमालयन वारियर उपनाम, प्रशिक्षकलाई धन्यवाद !

काठमाडौं। १९औं एसियाली खेलकुदमा नेपाललाई ऐतिहासिक कांस्य पदक दिलाएकी एरिका गुरुङलाई नेपाल कराते महासंघले हिमालयन वारियर उपनामले सम्मानित गर्ने भएको छ। 

महासंघको दोस्रो वार्षिक साधारण सभाले उक्त निर्णय गरेको हो। अघिल्लो वर्षको असोजमा चीनको होन्झाउमा सम्पन्न ६८ केजीको तौल समूहको फाइनलमा काजकिस्तानकी बेरुल्टसेवा सोफियासँग ३–० ले पराजित हुँदै एरिकाले ऐतिहासिक कांस्य पदक जितेकी थिइन्।

यसअघि तेक्वान्दोकी सविता राजभण्डारीले सन् १९९८ मा थाइल्यान्डमा भएको एशियाली खेलकुदमा रजत पदक प्राप्त गरेकी थिइन्। पछिल्लो संस्करणको रूपमा सन् २०१८ मा इन्डोनेसियाको जकार्तामा भएको एशियाडमा नेपालको प्याराग्लाइडिङ टिमले ऐतिहासिक रजत पदक हात पारेको थियो। 

यस्तै, महासंघले राष्ट्रिय टोलीका प्रशिक्षक कुशल श्रेष्ठ, मन्डेकाजी श्रैष्ठ र राष्ट्रिय टिम छनोट समिति संयोजक दावा गुरुङ र सदस्यहरूलाई दुई वर्षको पदक उपलब्धिका लागि धन्यवाद दिने निर्णय गरेको छ।