नेपाल भर्सेस सिंगापुर : नवनियुक्त प्रशिक्षकको ‘नाडी छाम्ने’ कडी !

काठमाडौं। एएफसी एसियन कप छनोटको तयारीमा रहेको नेपालले ३६ वर्षपछि सिंगापुरसँग मैत्रीपूर्ण फुटबल खेल्दैछ। 

सिंगापुर नेसनल स्टेडियममा हुने खेल शुक्रबार साँझ नेपाली समयअनुसार ६:१५ बजे हुनेछ। नेपाल र सिंगापुर सन् १९८९ पछि आमुन्नेसामुन्ने हुन लागेका हुन्। 

५ जुन १९८९ मा भएको पछिल्लो भेटमा सिंगापुरले नेपाललाई ७–० ले पराजित गरेको थियो। त्यसअघि भएको दुई भेट (१९८२ र १९८९) मा पनि नेपाल क्रमशः २–० र ३–० ले पराजित हुन पुगेको थियो।

सन् १९८९ मा भएको दुई खेल विश्वकप छनोटका हुन् भने १९८२ को खेल किङ्स कपको रहेको थियो। त्यसयता पहिलोपल्ट भिड्न लाग्दा नेपाली नवनियुक्त प्रशिक्षक म्याट रसले उत्कृष्ट खेल पस्किने आशा व्यक्त गरेका छन्।

‘म खेलाडीबाट बलियो प्रदर्शनको अपेक्षा गर्छु। सबै खेलाडी फिट छन्, त्यसैले उत्कृष्ट प्रतिद्वन्द्वीविरुद्ध ठूलो मञ्चमा हामी के गर्न सक्छौं भन्ने कुरामा म उत्साहित छु,’  उनले भने।

सिंगापुर फिफा वरीयतामा १६०औं स्थानमा छ। नेपाल भने त्यसको ठ्याक्कै १५ स्थान तल छ। यद्यपि, पछिल्लो समय सिंगापुरको प्रदर्शन चित्तबुझ्दो छैन।

अघिल्लो वर्ष फिफा विश्वकप छनोटका चार, दुई मैत्रीपूर्ण खेल र आसियन च्याम्पियनसिप गरेर १२ खेल खेलेको थियो। तीमध्ये आठ हार बेहोरेको थियो भने दुई बराबरीमा र दुई खेलमा जितको स्वाद चाख्न पाएको थियो। 

नेपालको हाल पनि सिंगापुरको जस्तै दैनिह छ। यही समयमा आठ खेल मात्रै खेल्न पाएको थियो। चार विश्वकप छनोट, दुई मैत्रीपूर्ण र दुई अनौपचारिक मैत्रीपूर्ण खेल खेलेको नेपालको नतिजा निराशाजनक रह्यो।

यीमध्ये नेपालले जित निकालेको भनेको गत नोभेम्बरमा भएको अफगानिस्तानविरुद्ध मात्रै हो। उक्त खेलमा नेपाल २–० ले विजयी भएको थियो। यस्तै, विश्वकप छनोटमा नेपालले यमनलाई २–२ को बराबरीमा रोकेको थियो। 

यसपल्ट नेपाल त्यो कमजोर टोलीको तथ्य फेर्ने लक्ष्यसाथ मैदान उत्रिने तरखरमा छ। तर, कमजोर तयारीले गर्दा नतिजा भने उत्कृष्ट निस्किनेमा अझै आशावादी हुनसक्ने ठाउँ देखिएको छैन।

किनभने सिंगापुरसँग खेल्न नेपालले मात्रै दुई हप्ताको तयारी गरेको छ। अझ नवनियुक्त प्रशिक्षक रसले खेलाडी र तिनका पोजिसन बुझ्ने समयसम्म पाएका छैनन्।

‘हामीले दुई हप्तासम्म घरमै राम्रो प्रशिक्षण क्लोज क्याप गरेका छौं। तर, नतिजा भने खेलपछि थाहा हुनेछ,’  उनले भने। उनले इटालियन प्रशिक्षक भिन्सेन्जो अर्ल्बेटो एनेसलाई प्रतिस्थापन गरेका हुन्।

एनेस प्रशिक्षक भएर आएपछि नेपालले थ्री नेसन्स कपमा तीन, साफ च्याम्पियनसिपमा तीन, विश्वकप छनोटमा सात खेल तथा तीन मैत्रीपूर्ण गरी १६ खेल खेलेको छ। जसमा नेपालले जम्मा चार खेल मात्र जितेको थियो। यस्तै, तीन खेल बराबरी खेल्दा १० मा पराजित बेहोरेको थियो।

त्यसैले रसका लागि यही खेल ‘डेब्यु’ हुनेछ। यसपल्ट उनीसामु ठूलो टोलीलाई पाखा लगाउनुपर्ने चुनौती छ। नेपालले सिंगापुरसँग खेलेपछि एएफसी एसियन कप छनोटको तेस्रो राउन्डमा मलेसिया, लाओस, भियतनामसँग होम एन्ड अबे गरेर ६ खेल खेल्ने छ।

यसबीचमा दक्षिण एसियाको मिनी विश्वकप भनेर चिनिने साफ च्याम्पियनसिप पनि खेल्नुपर्ने छ। त्यसैले सिंगापुरसँगको खेल उनको नाडी छाम्ने कडीको रूपमा लिइएको छ। यस्तोमा सिंगापुरविरुद्ध खेल्न उत्साहित रहेको कप्तान किरण चेम्जोङ बताउँछन्।

‘हामी दुई साता प्रशिक्षण गरेका थियौं। सिंगापुरसँग खेल्न उत्साहित छौं,’ उनले भने। सिंगापुरसँग उत्रिँदा नेपालले मिडफिल्डर लाकेन लिम्बूबाट अधिकतम फाइदा उठाउने प्रयास गर्नेछ। उनी त्यहीको ग्रास रुटमा नेपालसम्म आइपुगेका हुन्।

नेपालमा विभिन्न क्लबबाट खेलिसकेका उनी अहिले इन्डियन सुपर लिग (आइएसएल) क्लब दिल्ली एफसीमा आबद्ध छन्। उनी यही खेल खेल्न राष्ट्रिय टोलीसँग जोडिएका छन्। त्यसैले उनलाई रसले मुख्य भूमिकामा दिएका छन्।

त्यसबाहेक इन्डोनेसियाबाट व्यावसायिक लिग खेल्दै आएका डिफेन्सिभ मिडफिल्डर रोहित चन्दको पनि नेपाली टोलीलाई उत्तिकै साथ मिल्ने छ। तर, यी दुईबाहेक अन्य खेलाडी भने प्रतिस्पर्धात्मक क्लब फुटबल खेल्न पाएका छैनन्।

सिंगापुर पुगेका २३ मध्ये २० खेलाडी मोफसलका प्रतियोगितामा निर्भर छन्। कप्तान किरण आफैं क्लबविहीन भइसकेको २६० भन्दा बढी दिन नाघिसकेको छ। त्यसैले मलेसियाविरुद्धको खेलअघि टिममा ठूलो समस्या देखिने निश्चित छ। त्यही समस्या परिचाहन गर्न सिंगापुरविरुद्धको खेलले सहयोग पुग्ने रसले विश्वास लिएका छन्।

‘एसिया कप छनोटको ठिक अगाडि हुन लागेको यो खेलले टिममा भएको समस्या थाहा पाउन मद्दत गर्नेछ। त्यसको समाधान कसरी गर्न सकिन्छ भनेर यही खेलबाट थाहा हुनेछ,’ उनले भने।