काठमाडौं। मञ्जुश्री ट्रेल रेस (एमटिआर) को पाँचौं संस्करणमा चैत १ देखि ३ गतेसम्म हुने भएको छ।
आयोजकका अनुसार यसपालि पाँच सयभन्दा बढी धावक धाविका दौडने छन्। मञ्जुश्री ट्रेस रेसमा ३७१ नेपाली र १३१ विदेशी गरी कूल ५०२ जनाको सहभागिता रहनेछ। जसमध्ये पुरुष धावक ४०८ र महिला धाविका ९४ जना छन्।
पाँचौं मञ्जुश्री ट्रेल रेसमा एक सय माइल्स, एक सय किमी, ५० किमी, ३० किमी र दस किमी इभेन्टमा दौड हुनेछन्। १०० माइल्स स्वयम्भूस्थित सिङल ट्रिबाट सुरु भई सोही स्थानमा आएर सकिनेछ।
१०० किमी रेस नगरकोटको सेरेन रिसोर्टबाट, ५० किमी रेस गोदावरीबाट तथा ३० किमी रेस सोलिड रक लज डोल्लु पर्मिङबाट सुरु हुनेछ। सबै रेस सिङगलल ट्रिस्थित पवना हाउसमा पुगेर समाप्त हुनेछ।
मञ्जुश्री ट्रेल रेस एसिया ट्रेल मास्टर्सको क्वालिफायर पनि हो। मञ्जुश्रीमा विजेता हुने खेलाडीहरू भियतनामा हुने एसिया ट्रेल मास्टर्समा छनोट हुनेछन्। एसिया ट्रेल मास्टर्समा नेपाली खेलाडी उपाधि दाबेदारको रूपमा रहने गर्दछ। सन् २०२३ मा रसिला तामाङ र २०२४ मा प्रिया राईले एसिया ट्रेल मास्टर्सको उपाधि जितेका थिए।
मञ्जुश्री ट्रेल रेसअन्तर्गत १०० माइल्समा पहिलो देखि तेस्रो हुनेले क्रमशः ७५ हजार, ४० हजार र २० हजार प्राप्त गर्नेछ।
१०० किमीमा पहिलो देखि तेस्रो हुनेले क्रमशः ५० हजार, २५ हजार र १५ हजार तथा ५० किमीमा पहिलो देखि तेस्रो हुनेले क्रमशः ३० हजार, १५ हजार र १० हजार रुपैयाँ पुरस्कार पाउनेछ।
३० किमीमा पहिलोदेखि तेस्रो हुने क्रमशः २० हजार १० हजार र ५ हजार रुपियाँको हकदार हुनेछ। १० किमीमा भने नगद पुरस्कार राखिएको छैन।
