काठमाडौं। १०औं राष्ट्रिय खेलकुद प्रतियोगिता मूल आयोजक समितिको सचिवालय सुर्खेतमा स्थापना गरिने भएको छ।
सातदोबाटोस्थित अन्तर्राष्ट्रिय खेलकुद परिसरमा मंगलबार बसेको कर्णाली प्रदेशमा हुने प्रतियोगिताको मूल आयोजक समितिको पहिलो बैठकले सचिवालय फागुन २५ गते सुर्खेतमा स्थापना गर्ने निर्णय गरेको हो।
राष्ट्रिय खेलकुद परिषद् (राखेप) का अध्यक्ष युवा तथा खेलकुदमन्त्री तेजुलाल चौधरीको अध्यक्षतमा बैठक बसेको हो। प्रतियोगिताको सह–आयोजकको रुपमा कर्णाली प्रदेश सरकार रहनेछ।
त्यसैले कार्यसम्पादनका लागि अनुरोध गर्ने, पूर्वाधार निर्माण एवं स्तरोन्नित कार्यमा खर्च गर्ने गरी खेलकुद परिषद् अन्तर्गत खर्च नहुने पूँजीगत रकममध्येबाट कर्णाली प्रदेशलाई बजेट रकम हस्तान्तरणका लागि नेपाल सरकार अर्थ मन्त्रालयमार्फत आवश्यक प्रक्रियाका लागि अनुरोध गर्ने र प्रथम राष्ट्रिय पारा खेलकुद सञ्चालन तथा व्यवस्थापन सम्बन्धि (पूर्वतयारी, उद्घाटन एवं खेल सञ्चालन र समापन) कार्ययोजना पेस गर्न कार्यसम्पादन समितिलाई निर्देशन दिने निर्णय गरेको छ।
खेलकुद मन्त्री चौधरीले दसौं राष्ट्रिय खेलकुद अब कुनै हालतमा नसर्ने बताउँदै सम्बन्धित सबैलाई तयारीमा जुट्न आग्रह गरे । गत फागुन १५ गते बसेको राखेपको १२१औं बोर्ड बैठकले प्रतियोगिता जेठ ३ देखि १० गतेसम्म गर्ने निर्णय गरेको थियो ।
