काठमाडौं। पोखरा लेकर्समाथि विराटनगर ब्यान्डिट्सले एकपक्षीय जित हात पारेसँगै नेपाल कबड्डी लिग (एनकेएल) को प्ले–अफ समीकरण पूरा भएको छ।
त्रिपुरेश्वस्थित राष्ट्रिय खेलकुद परिषद् (राखेप) कभर्डहलमा शनिबार भएको लिगचरणको अन्तिम खेलमा विराटनगर ५०–२५ ले विजयी भएको हो।
योसँगै पहिलो क्वालिफायरमा अपराजित जनकपुर नाइट्स र विराटनगर भिड्ने भएका छन्। अपराजित रहँदै २३ अंक जोडेको जनकपुरले शीर्ष स्थानमा रहँदै पहिलो क्वालिफायरमा स्थान बनाएको हो।
विराटनगरले भने अंक तालिका काठमान्डु माभरिक्सलाई दुई अंकले पछि पार्दै जनकपुरसँगको भेट पक्का ग¥यो। यो खेलमा जित हात पार्ने टोली फाइनलमा प्रवेश गर्ने छ भने पराजित हुनेले अर्को मौका पाउने छन्।
विराटनगरले २१ र काठमान्डुले १९ अंक जोडे। काठमान्डुलाई भने इलिमिनेटरमा धनगढी वाइल्डक्याट्सले चुनौती पेस गर्नेछ।
शनिबार नै भएको खेलमा हिमालयन रेइडर्सलाई ४१–३८ अंकले पराजित गर्दै धनगढीले इलिमिनेटरमा स्थान बनाएको थियो। पाँच खेलबाट ११ अंक जोड्दै धनगढी चौथो स्थानमा रह्यो। समान खेलबाट सात अंक जोडेको हिमालयन र जितविहीन पोखरा प्रतियोगिताबाट बाहिरिएका छन्। पोखराले चार अंकसहित पहिलो संस्करण सक्काएको हो।
