काठमाडौं। नेपाल कबड्डी लिग (एनकेएल) मा बुधबार दुई जितविहीन टोली भिड्दै छन्। त्रिपुरेश्वस्थित राष्ट्रिय खेलकुद परिषद् (राखेप) कभर्डहलमा साँझ ६:३० बजे हुने खेलमा धनगढी वाइल्डक्याट्स र पोखरा लेकर्स भिड्ने भएका हुन्। तेस्रो चरण पुग्दा यी दुवै टोलीले स्पष्ट जित निकाल्न सकेका छैनन्।
पोखरा पहिलो खेलमा काठमाडौं माभरिक्ससँग ४२–४१ ले पराजित भएको थियो। दोस्रो खेलमा पनि पोखरा जितनजिक पुगेर हिमालयन रेइडर्ससँग ३०–३४ ले पराजित हुनपुग्यो।
यस्तै, धनगढीले पहिलो खेलमा विराटनगर ब्यान्डिससँग ३४–४६ को फराकिलो हार बेहोरेको थियो। दोस्रो खेलमा जनकपुर नाइट्ससँग पनि ३१–३७ ले पराजित हुन पुग्यो। यी दुवै खेलबाट पोखराले दुई अंक जोड्यो। पोखरा ६ टोलीसम्मिलित प्रतियोगिताको पाँचौं स्थानमा छ।
एक अंक जोडेको धनगढी पुछारमा छ।
