जनकपुर र विराटनगरको सहज जित

काठमाडौं। जनकपुर नाइट्सले बुटवलको हिमालयन रेइडर्सलाई ३५–२४ ले पराजित गर्दै शनिबार नेपाल कबड्डी लिग (एनकेएल) मा उत्कृष्ट सुरुआत गरेको छ।

त्रिपुरेश्वरस्थित कभर्डहलमा आयोजित खेलमा जनकपुरले पहिलो हाफमा १८–११ ले अग्रता लिएको थियो। त्यसबीच हिमालयन रेइडर्स एकपल्ट अलआउट भयो।

दोस्रो हाफमा पनि अलआउट भएको हिमालयनले प्रशिक्षक पार्वती राईले सम्हालेको जनकपुरलाई कुनै पनि बेला टक्कर दिन सकेन। जनकपुर ३०–१५ ले पनि अगाडि बढेको थियो।

यसअघि दिनको पहिलो खेलमा विराटनगर ब्यान्डिट्सले धनगढी वाइल्डक्याट्समाथि ४६–३४ को जित दर्ता गरेको थियो। सुरुआती अग्रता लिएको विराटनगर कुनै पनि अवस्थामा कठिन चुनौती सम्हाल्नु परेन। उसले पहिलो हाफमै धनगढीलाई दुईपल्ट अलआउट गर्‍यो। विराटनगरले पहिलो हाफमा २४–१६ को अग्रता लिएको थियो।