काठमाडौं। भारतीय ग्रान्डमास्टर गुकेश डोमाराजु सबैभन्दा कान्छो विश्व चेस च्याम्पियन बनेका छन्। उनी क्लासिकलको अन्तिम खेलमा डिफेन्डिङ च्याम्पियन डिङ लिरेनलाई पराजित गर्दै नयाँ विश्व च्याम्पियन बनेका हुन्।
सिंगापुरमा आयोजित च्याम्पियनसिपको १४ औं चरण बराबरीउन्मुख थियो। तर, चिनियाँ ग्रान्डमास्टर लिरेनले ५५ औं चालमा गल्ती गर्न पुगे, जसिलाई उपयोग गर्दै गुकेश १८ वर्षको उमेरमै विश्वविजेता बनेका हुन्। लिरेनविरुद्ध ७.५–६.५ को जित हात पारेसँगै उनले रसियन ग्रान्डमास्टर ग्यारी कास्पारोभ (२२ वर्ष) को रेकर्ड तोड्दै सबभन्दा कान्छो विश्व च्याम्पियन भएका हुन्।
क्यान्डिडेट्स टुर्नामेन्ट २०२४ को विजेता हुँदै च्यालेन्जरको रुपमा लिरेनविरुद्ध प्रतिस्पर्धा गर्ने अवसर पाएका गुकेश विश्व चेस च्याम्पियन बन्ने दोस्रो भारतीय खेलाडी पनि हुन्। विश्वनाथन आनन्द भारतका पहिलो विश्वविजेता हुन्, जसले पाँचपल्ट विश्व चेस च्याम्पियनसिपको उपाधि जितेका थिए। १८ औं विश्व च्याम्पियन भएका गुकेशले भारतीय टिमसँगै तीन महिनाअघि हंगेरीमा भएको ४५ औं चेस ओलम्पियाड २०२४ मा स्वर्णपदक पनि जितेका थिए।
विश्व च्याम्पियनको उपाधिसँगै गुकेशले ठूलो धनराशि पनि हात पारे। कुल २५ लाख अमेरिकी डलरको च्याम्पियनसिपमा गुकेशले १३ लाख ५० हजार डलर प्राप्त गरे भने लिरेनको भागमा ११ लाख ५० हजार डलर रह्यो।
-1734011624.jpg)
