बिनिता नेशनल बी चेसकी च्याम्पियन 

भक्तपुर । नेपाल बुद्धिचाल महासंघ र भक्तपुर जिल्ला बुद्धिचाल संघको संयुक्त आयोजनामा सञ्चालन भइरहेको नेशनल बी चेस प्रतियोगितामा काठमाडौंकी बिनिता कपाली वुमन च्याम्पियन भएकी छिन्। 

यससँगै बिनिताले माघमा हुने १० औं महिला राष्ट्रिय बुद्धिचाल प्रतियोगितामा आफ्नो सशक्त दाबेदारी प्रस्तुत गरेकी छिन्। उनले अन्तिम सातौं चरणको स्पर्धामा धनुषाकी शान्ति धिमाल माथि जीत दर्ता गर्दै ६ दशमलव ५ अंक जोडेर विजयी बनेकी हुन् । 

यस्तै चितवनकी लक्ष्मी कँडेल ५ दशमलव ५ अंक बनाएर दोश्रो स्थानमा रहन सफल भइन्। उनले पनि राष्ट्रिय खेलमा स्थान सुरक्षित बन्न काठमाडौकि एञ्जेल महर्जनसँग बराबरी खेलेकी छिन्। 

समान ४ दशमलव ४ अंक जोडेर संयुक्त तेस्रो स्थान ओगट्दै छनौट हुने क्रममा नेपालगञ्जकी ईशा गिरी, धनुषाकी शान्ति धिमाल, काठमाडौकी दानिशा पुरी, पर्साकी शुशीला गुरुङ, झापाकी पुनम प्रसाईं र काठमाडौकी एञ्जल महर्जन रहेकी छिन्। 

काठमाडौकी रिया श्रेष्ठ ३ दशमल ५ अंक जोडेर ९ औं  स्थान प्राप्त गर्न सफल भइन्। रियासँगै यी ९ खेलाडीले गत राष्ट्रिय प्रतियोगिताका शीर्ष ३ खेलाडी काठमाडौकी सिन्दिरा जोशी, झापाकी कृतिसारा अधिकारी र मकवानपुरकी पूजा भण्डारीसंग प्रतिस्पर्धामा उत्रने पक्का भएको छ। 

यसैगरी भक्तपुरको बाचमारीस्थित होटल सिटि गाउँ सभाहलमा सम्पन्न ८ औं चरणको खेल पश्चात् पुरुषतर्फ काठमाडौंका पुरुषोत्तम सिलवाल, दोलखाका आशिष फूँयाल र रौतहटका एफएम रुपेश जैसवाल समान ६ दशमलव ६ अंक जोडेर संयुक्त पहिलो स्थानमा रहन सफल भएका छन्। 

काठमाडौका धिरेन राई, ललितपुरका सुरोज महर्जन, काठमाडौंका एफएम रिजेन्द्र राजभण्डारी, मकवानपुरका सिएम मिलन लामा, भक्तपुरका निकेन कुसाथा समान ५ दशमलव ५ अंक बनाउँदै संयुक्त दोश्रो स्थानमा छन्। 

काठमाडौका सुरज सिंह, धनुषाका सुशील चौधरी, काठमाडौका विनय थापा, सिएम नवीन तण्डुकार र प्रेमकृष्ण महर्जन ५ दशमलव ५ अंक बटुल्दै संयुक्त तेस्रो स्थानमा छन्। 

भक्तपुर सूर्य विनायक नगरपालिकाको प्रमुख प्रायोजनमा सञ्चालन भइरहेको नेशनल बी चेस प्रतियोगितामा ४० जना राष्ट्रिय खेलाडीहरुले छनौटका लागि प्रतिस्पर्धा गरिरहेका छन्।  

पुरुषतर्फ जम्मा ९ जना खेलाडी छनौट भइ गत राष्ट्रिय च्याम्पियन शीर्ष तीन खेलाडी झापाका राजन सुवेदी, शुश्रुत दाहाल र मकवानपुरका क्षितिज भण्डारीसँग २५ औं नेपाल च्याम्पियन प्रतिस्पर्धामा स्पर्धा गर्नेछन्।