विराटनगर र जनकपुरको खेल हेर्न जाँदा प्रहरीसहित ७ जना घाइते

काठमाडौं। नेपाल प्रिमियर लिग (एनपिएल) अन्तर्गत विराटनगर किङ्स र जनकपुर बोल्ड्सबीचको उद्घाटन खेल हेर्न जाने क्रममा भीडमा च्यापिएर दुई प्रहरीसहित सात जना घाइते भएका छन्। 

कीर्तिपुरस्थित त्रिवि क्रिकेट मैदानमा शनिबार उक्त खेल भएको थियो। सोही खेल हेर्न जाँदा भीडमा च्यापिएर सात जना घाइते भएका जिल्ला प्रहरी परिसर काठमाडौँका प्रवक्ता, प्रहरी उपरीक्षक नवराज अधिकारीले जानकारी दिएका हुन्।

उनका अनुसार घाइते हुने प्रहरीमा जुम्ला घर भई  केन्द्रीय प्रहरी विशेष कार्यदल कपन दरबन्दी रहेका सङ्घीय संसद् सुरक्षा बेश बानेश्वरमा कार्यरत काम गर्ने प्रहरी दानबहादुर राउत र धादिङ खनियावास घर भई सोही बेसमा कार्यरत प्रहरी जवान अजय तामाङ रहेका छन्। यस्तै, गुल्मीका शिशिर गौतम, कपिलवस्तुका केशव आचार्य, रुपन्देहीको सिद्धार्थनगरका जयन श्रेष्ठ, बैतडीका केशव नेगी र रुकुम मुसिकोटका प्रेम खड्गी पनि घाइते भएका प्रहरीले जानकारी दिएको छ। 

घाइतेमध्ये प्रहरी जवान तामाङको अवस्था गम्भीर रहेको बताइएको छ। उनको अहिले बाँसवारीस्थित न्यूरो अस्पतालमा उपचार भइरहेको छ। अन्य घाइतेको काठमाडौंका विभिन्न अस्पतालमा उपचार भइरहेको छ।