डिआरएसको प्रायोजक बन्यो प्रभु बैंक

काठमाडौं। पब्जी मोबाइल ग्लोबल च्याम्पियनसिप २०२४ (पिएमजिसी २०२४) खेल्ने तयारीमा रहेको नेपाली टोली डिआरएस गेमिङ (द रियल सोल्जर) ले मुख्य प्रायोजकको रूपमा प्रभु बैंकको साथ पाएको छ।

डिआरएसका सीईओ भिक्टर पौडेलले भने, ‘पीएमजीसीको तयारीमा रहेको टिमलाई प्रभु बैंकको प्रायोजनले ठूलो उत्साह दिएको छ। समग्रमा प्रभु बैंकले डिआरएसलाई दिएको साथले नेपालमा ईस्पोर्ट्स राम्रो र सम्भावना भएको खेल क्षेत्रको रूपमा रहेको प्रष्ट पारेको छ।’

डिआरएसले पीएमजीसीको लागि नयाँ जर्सी पनि सार्वजनिक गरेको छ, जसमा भाय नेट र येचु हेयर आयलले पनि निरन्तरता दिएको छ।

डिआरएस गत वर्ष जकार्तामा, इन्डोनेसियामा भएको पिएमजिसी २०२३ ग्रयान्ड फाइनल्समा उपविजेता भएको थियो, जुन पब्जी मोबाइलमा नेपाली टोलीको सबैभन्दा ठूलो सफलता हो।

उसले अर्को साता मलेसियामा हुने पिएमजिसी २०२४ को समूह चरणमा प्रतिस्पर्धा गर्दैछ, जहाँ उसले उत्कृष्ट प्रदर्शन गर्दै लन्डन, बेलायतमा हुने ३० लाख अमेरिकी डलर पुरस्कारको ग्रयान्ड फाइनल्समा स्थान बनाउने प्रयास गर्नेछ।