काठमाडौं। प्रधानमन्त्री केपी शर्मा ओलीले साफ महिला च्याम्पियनसिप २०२४ मा विजेता भइएन भन्दैमा दुःख नमान्न नेपाली टोलीलाई आग्रह गरेका छन्।
प्रधानमन्त्री निवास, बालुवाटारमा बुधबार टोलीसँगको भेटमा उनले त्रिपुरेश्वरस्थित दशरथ रंगशालामा बंगलादेशविरुद्धको फाइनलमा प्रदर्शन उत्कृष्ट भए पनि प्राविधिक कारणवश दोस्रो हुनुपरेको बताए। त्यसैले दुःख नमान्न उनले खेलाडीसमक्ष आग्रह गरेका हुन्।
‘विजेता भइएन भन्दैमा दुःख नमानौं। तेञ्जिङ नोर्गे पनि एकै पटकमा नभई सर्वोच्च शिखर सगरमाथा पुग्न सफल भएका होइनन्। उनलाई पनि आठौं पटक लागेको थियो । आगामी यस्ता खेलमा हामीले जित्ने प्रयासलाई अघि बढाउनुपर्छ,’ उनले भने।
आगामी आठौं संस्करणमा हामी जित्छौं भन्ने मर्मका साथ लाग्न उनले आग्रह गरे। बुधबार भएको फाइनलमा बंगलादेशसँग नेपाल २-१ ले पराजित भएको थियो। अघिल्लो संस्करण पनि बंगलादेशसँग नेपाल ३-१ ले फाइनलमै पराजित भएको थियो। योसँगै नेपाल छैटौंपल्ट उपविजेतामा सीमित भएको हो।
