रुब्रेश्री, अग्रता, निहाना र एन्जल विजयी

काठमाडौं। प्याट्रिओटिक पन चेस च्याम्पियनसिपको गर्ल्समा रुब्रेश्री चौलागाईं, अग्रता आचार्य, निहाना श्रेष्ठ र एन्जल महर्जन च्याम्पियन बनेका छन्।

संविधान दिवसको उपलक्ष्यमा हिमालयन चेस एकेडेमीले बिहीबार आयोजना गरेको प्रतियोगितामा उनीहरूले विभिन्न विधामा उपाधि जितेका हुन्।  प्रतियोगितामा यु–७, यु–९, यु–११ र यु–१३ विधामा ४९ बोइज र गर्ल्स खेलाडीले सहभागिता जनाएका थिए।

यु–७ गर्ल्सतर्फ रुब्रेश्री विजयी भइन्। यस्तै, आहाना शाहले दोस्रो र शुभानी पण्डितले तेस्रो स्थानमा हात पारिन्। गर्ल्स यु–९ अग्रता आचार्यले प्रभावशाली पाँच अंकका साथ आफ्नो वर्चस्व कायम गरिन्। अमिषा कोइराला चार अंकका साथ दोस्रो स्थानमा चित्त बुझाउँदा प्रियंशा प्रधान तीन अंकसहित शीर्ष तीनमा रहिन्। यु–११ मा निहाना दुई अंकसहित विजेता बन्दा नयुमा मगर र डोमा तामाङले क्रमश: दोस्रो र तेस्रो स्थान हात पारिन्। यु–१३ मा एन्जल महर्जनले उपाधि जितिन् भने क्रिष्टि रिजाल उपविजेता सीमित भइन्।

बोइजको यू–७ विधामा रातो बंगला स्कुलकी शुभाङ्ग प्रधान र साङ्ग्रिला पब्लिक स्कुलका सयश बस्नेत दुवैले साढे चार अंक जोडेका थिए। तर, टाइब्रेकर शुभांगा विजयी हुन सफल भए। अवन महर्जन तीन अंकसहित तेस्रो भए। यू–९ तर्फ प्रकृति बाटिका स्कुलका शौमिल चित्रकारले चार अंकका साथ अग्रता बनाएका थिए। एल्विक अधिकारीले चार अंक बनाए पनि टाइब्रेकको आधारमा दोस्रो स्थानमा रहे। उत्कृर्ष गिरी साढे तीन अंकका साथ तेस्रो भए।

प्रसित खनालले पाँच अंकका साथ यु–११ मा उत्कृष्ट प्रदर्शन गरे। सात्विकमान तुलाधर चार अंकका साथ दोस्रो स्थानमा रहे भने लियोन महर्जनले पनि ४ अंक जोडेर तेस्रो स्थानमा हासिल गर्न सफल भए।

यु–१३ मा प्रविर केसी विजय भए। उनले साढे चार अंक जोडे। निश्चल रिमाल र तपस तामाङ दुवैले साढे तीन अंक जोडेका थिए। तर, निश्चलले टाइब्रेकबाट दोस्रो स्थान हासिल गरे।

प्रत्येक विधाका उत्कृष्ट तीन विजेतालाई प्रमुख अतिथि अल एन्जलस नेपालकी अध्यक्ष अमिषा श्रेष्ठ र हिमालयन चेस एकेडेमी थापाथलीकी संस्थापक मोनालिशा खम्बूले मेडल, प्रमाणपत्र र ट्रफी प्रदान गरेका थिए।