एसिया रग्बी प्रतियोगिता दशरथ रंगशालामा

काठमाडौं। एसिया रग्बी महिला तथा पुरुष सेभेन्स ट्रफी–२०२४ प्रतियोगिता असोज १८ र १९ गते हुने भएको छ। एसिया रग्बीको आयोजना र नेपाल रग्बी संघको व्यवस्थापनमा प्रतियोगिता दशरथ रंगशालामा सञ्चालन हुन लागेको हो।

नेपाल रग्बी संघले इतिहासमा पहिलो पटक एसिया रग्बी यु–१८ सेभेन्स २०२२ र दोस्रो पटक एसिया रग्बी यु–२० सेभेन्स २०२३ को आयोजना गरेको थियो। त्यसयता नेपालले प्राप्त गरेको यो तेस्रो सबैभन्दा ठूलो अन्तर्राष्ट्रिय प्रतियोगिता हो। 

प्रतियोगितामा एसियाका नेपालसहित १७ राष्ट्रको सहभागिता रहनेछ। जसमा पुरुष रग्बी सेभेन्सतर्फ १४ र महिला रग्बी सेभेन्समा आठ टोलीले सहभागिता जनाउने छन्। यस प्रतियोगितामा एसियाका ४५० भन्दा धेरै खेलाडी तथा अफिसियलले सहभागी जनाउने अध्यक्ष दीपक देवकोटाले जानकारी दिए।

यस प्रतियोगिता सञ्चालनका लागि करिब २८० लाख रुपैयाँ लागत लाग्ने अनुमान गरिएको छ। प्रतियोगिताको च्याम्पियन महिला तथा पुरुष टोलीले एसिया रग्बीको ट्रफीसहित स्वर्ण पदक प्राप्त गर्नेछन्। दोस्रो हुने टोलीले रजत र तेस्रो हुने टोलीले कांस्य पदक प्राप्त गर्नेछन्। 

नेपालले सन् २०१६ देखि एसिया रग्बी महिला तथा पुरुष सेभेन्स ट्रफीमा निरन्तर रूपमा महिला तथा पुरुष रग्बी टिमलाई सहभागी गराउँदै आइरहेको छ। गत वर्ष कतारमा सम्पन्न भएको एसिया रग्बी सेभेन्स ट्रफी २०२३ मा नेपालको पुरुष टोलीको उत्कृष्ट प्रदर्शनमा साउदी अरेबिया र किर्गिस्तानलाई पराजित गरेको थियो।

सन् २०२२ मा नेपालले बंगलादेशमा बंगबन्धु कपमा पहिलोपल्ट रग्बी १५ ए साइडमा डेब्यु गरेको थियो। त्यसयता नेपालको राष्ट्रिय रग्बी १५ ए साइड टोलीले भारतमा एसिया रग्बी च्याम्पियनसिप डिभिजन ३ खेलेपछि सोही खेलको आधारमा विश्व रग्बी महासंघले पूर्ण सदस्यता दिएको थियो। रग्बीले नवौं राष्ट्रिय खेलकुद प्रतियोगिता तथा १९औं एसियाली खेलकुदमा सहभागिता जनाइसकेको छ।