प्रशिक्षण बिचैमा छाडेर स्वदेश फर्किन् फुपु

काठमाडौं । टोकियो ओलम्पिकको छनोटको तयारीका लागि जापानमा प्रशिक्षणरत जुडो खेलाडी फुपु ल्हामु खत्री नेपाल फर्किएकी छिन् । गत बर्ष भएको साउथ एशियन जुडो च्याम्पियनसिप लगत्तै ओलम्पिक तयारीका लागि जापानमा प्रशिक्षण गर्न गएकी खत्री सम्बन्धित निकायलाई थाहै नदिएर स्वेदेश फर्किएकी हुन् । उनी करिब ८ महिना जापानमा प्रशिक्षण गरिन ।

‘औपचारिक प्रक्रिया अघि बढाउदाँ कुनै जानकारीनै नदिएर फुपु नेपाल फर्किएको सुन्नमा आएको छ ।’ नेपाल जुडो संघका अध्यक्ष दिपकहर्ष बज्राचार्यले भने ।

प्रशिक्षणका लागि जापान पुगे लगत्तै फुपु घाईते भएको र मानसिक रुपमा तनावमा रहेको जानकारी आफुलाई प्राप्त भएको अध्यक्ष बज्राचार्यको भनाई छ ।

१२ औ दक्षिण एसियाली खेलकुद प्रतियोगिता सागमा जुडोमा नेपाललाई स्वर्ण दिलाएकी फुपुलाई सम्भावना भएको खेलाडीको रुपमा ओलम्पिक कमिटिले बैदेशिक प्रशिक्षणको व्यवस्था मिलाएको थियो ।

सन् २०२० मा जापानमा हुने ओलम्पिकमा छनोटमार्फत खेलाडी सहभागि गराउने योजना स्वरुप फुपुलाई जापानमा प्रशिक्षणमा पठाईएको थियो । अन्तराष्ट्रिय ओलम्पिक कमिट, जापान ओलम्पिक कमिटि र नेपाल ओलम्पिक कमिटिको सहकार्यमा नेपाल जुडो संघसंग समन्वय गरेर फुपुलाई दिर्घकालिन योजना अन्तर्गत जापानमा प्रशिक्षणको व्यवस्था मिलाईएको थियो ।

‘जुन उद्वेश्यले हामीले उहाँलाई जापान पठायौ । त्यसमा उहाँ गम्भिर नभएर त्यहाँबाट प्राप्त रिपोर्टले देखाउँछ ।’ नेपाल ओलम्पिक कमिटिका अध्यक्ष जिवनराम श्रेष्ठले भने, ‘अभ्यासलाई केन्द्रित गरेर खेलाडीलाई नराख्ने हो भने पदक जित्न निकै गाह्रो छ भन्ने कुरा यो घटनाले देखाउँछ ।’

पछिल्लो घटनाले थप खेलाडीलाई विदेशमा अभ्यासकालागि पठाउने बिषयमा असर गरेको श्रेष्ठले बताए ।

‘जापानबाट आएको रिपोर्ट अनुसार उनको अभ्यासप्रति खासै लगाव नभएको देखिएको छ । समयमा नसुत्ने र धेरै मोबाईल खेलाउने जस्ता कुरा आएका छन् । रिपोर्टहरु चाँडै सार्वजनीक गछौ ।’ अध्यक्ष श्रेष्ठले भने ।

तर सागकी स्वर्णधारी खेलाडी फुपुले आफुले ओलम्पिक कमिटि र जुडो संघको नेतृत्वलाई जानकारी दिएर मात्र नेपाल फर्किएको दाबी गरेकी छिन् ।

‘मैले धेरै म्यासेज गरेको थिए । फोन गरेको थिए । तर सबै प्रक्रियामा छ भन्ने मात्र जवाफ आयो । म निकै निराश भईसकेको थिए ।’ उनले खेलपाटीसंग भनिन् ।
फुपुले जापानको बस्ने वातावरण नमिलेको भन्दै आफुलाई मानसिक तनाव दिने काम भएको बताईन् ।

‘वातावरणनै मिलेन । २४ घण्टा एक्लै बस्न पर्ने अवस्था थियो । सबैले हेला गर्थे । अभ्यास गर्दा समेत गुरुले खाली मानसिक तनाव दिने काम गरे ।’ उनले थपिन्, ‘सिक्नै गएको हो । आफ्नो लागि छुट्टै ठाउँ बनाउ भन्नेनै थियो । तर तनाव सहन नसकेर स्वेदश आए ।’

उनले भनिन्, ‘म बिना कारण फर्कने मान्छे होईन । सबैलाई जानकारी दिएको हो । म आफै आउछु भनेर आएको हुँ ।’