काठमाडौँ। नवौँ एशियाली पारा तेक्वान्दो च्याम्पियनसिप (जी– ४४) २०२४ मा सहभागी हुन ३ खेलाडीसहित ४ सदस्यीय नेपाली टोली शुक्रबार भियतनामको दनाङ प्रस्थान गर्ने भएको छ।
टोलीलाई राष्ट्रिय खेलकुद परिषद्का सदस्य–सचिव टंकलाल घिसिङले बिहीबार एक कार्यक्रमबीच बिदाइ गरे। कार्यक्रमलाई सम्बोधन गर्दै सदस्य–सचिव घिसिङले उच्च प्रदर्शनका लागि खेलाडीलाई शुभकामना दिँदै तेक्वान्दोको विदेशकी प्रशिक्षक झिकाउने विषयमा तेक्वान्दो संघले चाँडो प्रक्रिया पूरा गर्नुपर्नेमा जोड दिए।
प्रतियोगितामा पलेशा गोवर्धनले महिला ५७ केजीमुनि, भरतसिंह महताले पुरुष ५८ केजीमुनि र अमिर भ्लोनले पुरुष ६३ केजीमुनि तौल समूहमा प्रतिस्पर्धा गर्ने छन्। प्रशिक्षकमा कविराज नेगी लामा रहेका छन्। प्रतियोगितामा ३१ राष्ट्रका खेलाडी सहभागी हुने बताइएको छ।
पलेशाले छनोट चरण पार गरेर पेरिस प्यारालिम्पिकमा सहभागिता निश्चित गरिसकेकी छिन्। छनोट चरण पार गरेर प्यारालिम्पिकमा सहभागिता पक्का गर्ने पलेशाले पहिलो र एक मात्र खेलाडी हुन्।
पलेशाले चीनको ताइयानमा गत चैत ४ गते भएको एशियाली छनोटमा स्वर्ण पदक जित्दै पेरिस प्यारालिम्पिकमा छनोट भएकी थिइन्। पलेशा चौथो एशियाली पारा खेलकुदको कांस्य पदक विजेता पनि हुन्। उक्त पदक नेपालले पारा एशियाली खेलकुदमा हासिल गरेको एक मात्र हो।
पलेशाले सन् २०२१ मा बहराइनमा भएको यूथ एशियन गेम्समा स्वर्ण पदक र सन् २०१८ मा भियतनाममा भएको एशियन पारा तेक्वान्दो च्याम्पियनसिपमा कांस्य पदक जितेकी थिइन्।
नेपाल तेक्वान्दो संघले पेरिस प्यारालिम्पिकमा सहभागी गराउन अमिर र भरतको वाइल्ड कार्डका लागि आवेदन दिइसकेको प्रशिक्षक लामा जानकारी गराए। एशियन च्याम्पियनसिपबाट र्याङकिङमा आउन र र्याङकिङमा सुधार गर्न मद्दत पुग्ने भएको हुँदा अमिर र भरतलाई सहभागी गराइएको हो।
प्रशिक्षकको भूमिकामा रहेका लामाले सन् २०१५ देखि पारा तेक्वान्दो प्रशिक्षकको जिम्मेवारी सम्हाल्दै आएका छन्। उनको प्रशिक्षणमा नेपालले अहिलेसम्म १० वटा अन्तर्राष्ट्रिय पदक जितिसकेको छ। जसमा तीन स्वर्ण, दुई रजत र पाँच कांस्य छन्।
बिदाइका अवसरमा राखेपका सदस्य–सचिव प्रकाशकुमार कुसारी, राष्ट्रिय टिम तयारीका निर्देशक दीपक विष्ट, नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठ, नेपाल तेक्वान्दो संघका उपाध्यक्ष भानबहादुर चन्द, सदस्यद्वय रामचन्द्र श्रेष्ठ र कुमार लामा घिसिङलगायतको उपस्थिति रहेको थियो।
