एन्फा अन्तरकलेज फुटसलमा २४ टोली

काठमाडौँ। एन्फा अन्तरकलेज फुटसल च्याम्पियनसिपमा २४ टोलीले सहभागिता जनाउने भएका छन्।

अखिल नेपाल फुटबल संघ (एन्फा) को आयोजनामा आगामी बैशाख २२ देखि जेठ ५ गतेसम्म हुने प्रतियोगितामा प्लस टू र ब्याचलर अध्ययनरत विद्यार्थीहरूको २४ टिम सहभागी हुन लागेका हुन्।

सहभागी टिमलाई ८ समूहमा विभाजन गरिने एन्फाले जनाएको छ। यसो गर्दा हरेक समूहमा ३-३ टिम हुनेछन्। लगनखेलस्थित नेपाली सेनाको शारीरिक प्रशिक्षण केन्द्रको हलमा हुने खेलहरू लिग कम नकआउटका आधारमा खेलाइनेछ।

प्रतियोगिताको विजेताले ५ र उपविजेताले ३ लाख रुपैयाँ प्राप्त गर्ने छन्। मोस्ट भ्यालुएबल प्लेअरले ५०, सर्वाधिक गोलकर्ता र उत्कृष्ट गोलकिपरले समान २५ हजार रुपैयाँ प्राप्त गर्नेछन्।