रेफ्री टोलीलाई प्रतियोगिताबाट हटाउन इजिप्टको माग

काठमाडौं । इजिप्ट फुटबल संघ (ईएफए)ले अर्जेन्टिनाविरुद्धको विश्वकप अन्तिम १६ को खेलमा भएको रेफ्रिप्रति गम्भीर असन्तुष्टि जनाउँदै सम्बन्धित रेफ्री टोलीलाई प्रतियोगिताबाट हटाउन माग गर्दै फिफामा औपचारिक उजुरी दर्ता गरेको छ।

ईएफएका अनुसार खेलमा रेफ्री र भिडियो सहायक रेफ्री (भीएआर)ले दोहोरो मापदण्डू अपनाएको तथा गम्भीर निर्णयगत त्रुटि गरेको भन्दै घटनाको निष्पक्ष छानबिन गर्न फिफासँग माग गरिएको छ।

खेलको दोस्रो हाफमा इजिप्ट १-० ले अघि रहेका बेला मोस्तफा जिकोले गरेको गोल भीएआरको हस्तक्षेपपछि रद्द गरिएको थियो। गोल बन्नुअघि इजिप्टका मिडफिल्डर मारवान अत्तियाले अर्जेन्टिनाका डिफेन्डर लिसान्द्रो मार्टिनेजको खुट्टामा टेकेको भन्दै फाउल दिइएको थियो।

त्यसपछि खेलको अन्तिम समयमा मोहम्मद सलाहलाई अर्जेन्टिनाको पेनाल्टी क्षेत्रभित्र फाउल गरिएको इजिप्टको दाबी रहे पनि रेफ्रीले त्यसलाई बेवास्ता गरे। त्यसको केही क्षणमै अर्जेन्टिनाले काउन्टर आक्रमण गर्दै इन्जुरी समयमा विजयी गोल गर्दै ३-२ को रोमाञ्चक जित निकालेको थियो।

ईएफएले जारी गरेको विज्ञप्तिमा भनिएको छ, “इजिप्ट फुटबल संघका अध्यक्ष हानी अबु रिदाले फ्रान्सेली रेफ्री फ्राँस्वा लेटेक्सियर र उनको रेफ्री टोलीले गरेका गम्भीर निर्णयगत त्रुटि तथा दोहोरो मापदण्डका कारण इजिप्ट विश्वकपबाट बाहिरिन बाध्य भएको भन्दै फिफामा उजुरी दर्ता गर्नुभएको छ।”

संघले रेफ्री तथा भीएआर टोलीमाथि अनुसन्धान गर्न, केही स्पष्ट दृश्यहरू पुनरावलोकन नगरेको आरोपको छानबिन गर्न तथा दोषी ठहरिए सम्पूर्ण रेफ्री टोलीलाई विश्वकपबाट हटाउन माग गरेको छ। साथै, इजिप्ट राष्ट्रिय टोलीमाथि विभेद गरिएको आरोप पनि लगाएको छ।

इजिप्टको इतिहासमा विश्वकपको क्वार्टरफाइनल यात्रा अझै सम्भव हुन सकेको छैन। यसपटक पनि अन्तिम १६ मै हार बेहोरेपछि टोलीको यात्रा टुंगिएको हो।

अर्जेन्टिनाका कप्तान लियोनेल मेस्सीले ७९औँ मिनेटमा पहिलो गोलका लागि पास उपलब्ध गराएका थिए भने ८३औँ मिनेटमा स्वयं बराबरी गोल गर्दै टोलीलाई खेलमा फर्काएका थिए। सम्भवतः यो मेस्सीको अन्तिम विश्वकप हुन सक्ने चर्चा भइरहेको छ।

खेलपछि इजिप्टका मुख्य प्रशिक्षक होसाम हसनले आफ्नो टोलीमाथि अन्याय भएको आरोप लगाए।

उनले भने, “हामीमाथि अन्याय भयो। सायद उनीहरू विश्व विजेता टोलीलाई प्रतियोगितामै राख्न चाहन्थे। सायद उनीहरू मेस्सीलाई पनि प्रतियोगितामा अगाडि बढाउन चाहन्थे।”

गोल रद्द भएका मोस्तफा जिकोले पनि रेफ्रीको निर्णयप्रति आक्रोश व्यक्त गर्दै भने, “रेफ्री अत्यन्त अन्यायी थिए। खेलको सुरुदेखि नै हामीमाथि अन्याय भएको स्पष्ट देखिन्थ्यो। यो प्रतियोगिता मिलेमतोमा सञ्चालन गरिएको जस्तो देखिन्छ।”

अब अर्जेन्टिनाले शनिबार (नेपाली समय आइतबार बिहान) क्यान्सस सिटीमा स्विट्जरल्यान्डसँग प्रतिस्पर्धा गर्नेछ।