काठमाडौं । अन्तर नगरपालिका राष्ट्रिय क्रशकन्ट्री दौडको उपाधि हलेसी नगरपालिकाका गजेन्द्र राई र चन्दननाथ नगरपालिकाका पूर्णलक्ष्मी न्यौपानेले जितेका छन् । काठमाडौंको चन्द्रागिरी नगरपालिकामा शनिबार भएको प्रतियोगिताको पुरुष १० किलो मिटर सिनियरमा गजेन्द्र र महिला स्पर्धामा पूर्णलक्ष्मी पहिलो बनेका हुन् ।
गजेन्द्रले निर्धारित दुरी ३२ मिनेट २६ सेकेन्डमा पार गरे । दशरथचन्द्र नगरका नरेन्द्र सिंह रावल ३२ मिनेट ३८ सेकेन्ड सहित दोस्रो र हलेसी नगरका सन्जय श्रेष्ठ ३३ मिनेट १२ सेकेन्डको समय सहित तेस्रो बने ।
महिला स्पर्धामा पहिलो बनेकी पूर्णलक्ष्मीले निर्धारित दुरी ४१ मिनेट ३० सेकेन्डमा पुरा गरिन् । जिरी नगरकी सुमित्रा चौधरी ४२ दशमलव ५५ सेकेन्ड सहित दोस्रो र भोजपुरकी अनिता राई ४६ मिनेट ०४ सेकेन्ड सहित तेस्रो बनिन् ।
दुवै स्पर्धाका विजेताले २५ हजार, तेस्रोले १५ हजार तेस्रोले १० हजार रुपैयाँ प्राप्त गरे ।
महिला ५ किलो मिटर जुनियरमा तारकेश्वर नगरपालिकाका अस्मिता भुजेल पहिलो भईन् । उनले निर्धारित दुरी २२ मिनेट ५९ सेकेन्डमा पार गरिन् । सुनबर्सी नगरपालिकाकाकी अंशुकुमारी मण्डल २३ मिनेट ११ सेकेन्डको समय सहित दोस्रो र भोजपुर नगरकी जुई राई २३ मिनेट १८ सेकेन्ड सहित तेस्रो बनिन् ।
पुरुष ५ किलो मिटर जुनियर स्पर्धामा पोखरा महानगरका कृषबहादुर परियार १७ मिनेट ४५ सेकेन्ड सहित पहिलो बने । चौतारा नगरका बिषराज कुवर १७ मिनेट ५५ सेकेन्ड सहित दोस्रो र पोखरा महानगरका बादल कार्की १८ मिनेट ३५ सेकेन्ड सहित तेस्रो बने ।
दुवै स्पर्धाका विजेताले १५ हजार, दोस्रोले १० हजार र तेस्रो हुनेले ७ हजार रुपैयाँ प्राप्त गरे ।
महिला १० किलो मिटर महिला टिममा भोजपुर नगरपालिकाका अनिता राई, सविना राई र सुनकला राई सम्मिलित टोली पहिलो बन्यो । चन्द्रागिरी नगरपालिकाका सर्मिला बोगटी, संगीता दाहाल, सर्मिला बस्नेत दोस्रो र मनरासिस्वा नगरपालिकाका रैगिरी कुमारी, निशा कुमारी र प्रिती कुमारी ठाकुरको टिम तेस्रो बन्यो ।
पुरुष १० किलो मिटर टिम इभेन्टमा हलेसी नगरपालिकाका गजेन्द्र राई, सञ्जय श्रेष्ठ र श्याम मग्रातीको टिम पहिलो बन्यो । दशरथचन्द्र नगरपालिकाको नगेन्द्र सिंह रावत, किरण रावल र प्रेम बस्नेतको टिम दोस्रो र नागर्जुन नगरपालिकाको निरज क्षेत्री, राजेन्द्र तामाङ र सञ्जिव न्यौपानेको टिम तेस्रो बन्यो ।
दुवै स्पर्धाका विजेता टिमले समान २४ हजार, दोस्रोले १८ हजार र तेस्रोले १२ हजार रुपैयाँ प्राप्त गरे ।
महिला ५ किलोमिटर जुनियर टिम स्पर्धामा भोजपुर नगरपालिकाबाट प्रतिनिधित्व गरेका जुई राई, बिनिता राई, जुलिन राईको टिम पहिलो बन्यो । भक्तपुरको उर्जा मधिकर्मी, क्याथ्रिन बासुकला र जोशिका दुवालको टिम दोस्रो र भिमेश्वर नगरपालिकाको पूर्णिमा श्रेष्ठ, अमृता बलामी र यमुना परियारको टिम तेस्रो बन्यो ।
पुरुष ५ किलो मिटर जुनियर टिम स्पर्धामा चन्द्रागिरीको छेवाङ्ग रोकाया, अजुज महत र हस्त सुनुवारको टोली पहिलो बन्यो । चन्द्रागिरी नगरपालिकाकै बी टिममा रहेका दोर्जे लामा, सिरल थापा र विकि विकको टोली दोस्रो र चांगुनारायण नगरपालिकाको दावाराज मैनाली, सन्तोष कार्की र पर्वत भण्डारीको टोली तेस्रो बन्यो ।
दुवै स्पर्धाका विजेता टिमले १५ हजार, दोस्रोले १२ हजार र तेस्रो हुनेले ९ हजार रुपैयाँ प्राप्त गरे ।
विजेता खेलाडीलाई नगरपालिकाका महासंघका अध्यक्ष भिमप्रसाद ढुङ्गाना, चन्द्रागिरी नगरका मेयर घनश्याम गिरी, चन्द्रागिरी नगरका प्रवक्ता कृष्णप्रसाद खड्गी, एथलेटिक्स परिवार नेपालका अध्यक्ष राजन खत्री लगायतले पुरस्कृत गरेका थिए ।
समष्टिमा प्रथम, दोस्रो र तेस्रो हुने नगरपालिकाको घोषणा एक औपचारिक कार्यक्रमको आयोजना गरेर सार्वजनीक गरिने आयोजकले जनाएको छ ।
समापन समारोहमा कीर्तिमानी धावक बैकुन्ठ मानन्धर र राजेन्द्र भण्डारीलाई चन्द्रागिरी नगरपालिकाले सम्मान गरेको थियो । नेपाल एथलेटिक्स परिवार नेपालको आयोजना र चन्द्रागिरी नगरपालिकाको सह–आयोजनामा देशभरका नगरपालिका सम्मिलित प्रतियोगिताको ब्यवस्थापन प्रो स्पोर्ट्स प्रालीले गरेको थियो ।
