काठमाडौं । नेपालका उद्धव थापा मगर र गुना गुरुङले अन्तर्राष्ट्रिय मार्सल आर्ट्स च्याम्पियनसिपमा पदक जितेका छन् । उद्धवले दोहोरो स्वर्ण तथा गुनाले रजत जितेकी हुन् ।
युकेको योर्कसायरमा अगष्ट १३ तारिखमा भएको प्रतियोगितामा उद्धवले ट्रेडिसनल चाइनिज फम्र्सअन्तर्गत स्वोर्ड र ड्रङकन विधामा गरी दुई स्वर्ण जिते ।
गुनाले ताइची स्पर्धामा रजत जितिन् । अर्का सहभागी समिर श्रेष्ठले पदकविहीन रहिन् ।
प्रतियोगिताको व्यवस्थापकमा तेजबहादुर बरुवाल छन् भने युकेमा नेपाली टोलीको समन्वय लक्ष्मी मगरले गरेकी थिइन् ।
आदिवासी खेलकुद संघ नेपालका अध्यक्ष रहेका नेपाल उमा कुङफु संघका महासचिव भुपेन्द्र गुरुङले खेलाडीले पदक जितेकोमा खुशी व्यक्त गर्दै विजेतालाई बधाइ दिए ।
उनका अनुसार टोली अगष्ट २० तारिखमा स्वदेश फर्किने कार्यक्रम रहेको छ ।
