काठमाडौं । मुकेश पाल र राममाया बुढाले शनिबार युथ ओपन फाइभ के रनको उपाधि जितेका छन् ।
त्रिभुवन आर्मी क्लबका मुकेश पुरुषतर्फ र नेपाल पुलिस क्लबकी राममाया महिलातर्फ च्याम्पियन बनेका हुन् ।
त्रिपुरेश्वरस्थित दशरथ रंगशालामा मुकेशले निर्धारित दुरी १५ मिनेट २७.८ सेकेण्डमा पूरा गर्दै उपाधि जिते ।
पुरुषतर्फ दोस्रो भएका आर्मीका श्रीकाश राईले १६ मिनेट ०८.६ सेकेण्डको समय निकाले । आर्मीकै शुशील कुमार शाही १६ मिनेट ०९.७ सेकेण्डको समय सहित तेस्रो भए ।
पुलिसका नागेश्वर अहिर चौंथो, एपीएफका सन्जिब नेपाली पाँचौं भए । राजेन्द्र तामाङ छैटौं, शिव रायमाझी सातौं, मिङमार सिंह तामाङ आठौं, सन्दीप ढकाल नवौं र अक्कल पाल दशौँ स्थानमा रहे ।
महिलातर्फ राममायाले १८ मिनेट ५३.२७ सेकेण्डको समय निकाल्दै उपाधि जितेकी हुन् । आर्मीका पुर्णलक्ष्मी न्यौपाने १८ मिनेट ५५.५० सेकेण्डको समयसहित दोस्रो भए । तेस्रो स्थान हासिल गरेकी एपीएफकी आशा रावतले १९ मिनेट ३९.३२ सेकेण्डको समय निकालिन ।
यस्तै सुमित्रा चौधरी चौंथो, सुजना पाण्डे पाँचौं,अश्मिता भुजेल छैटौं, सुशन कार्की सातौं, सोनु घतानी आठौं, बबिता राई नवौं र विमला तामाङ दशौँ स्थानमा रहे ।
एथलेटिक्स परिवार नेपालको आयोजनामा भएको प्रतियोगिताको विजेता महिला र पुरुष खेलाडीले ट्रफी, पदकसहित समान २० हजार रुपैयाँ प्राप्त गरे ।
यस्तै दोस्रो हुनेले १० हजार, तेस्रोले ५ हजार, चौथो र पाँचौं हुनेले समान दुई हजार प्राप्त गरे । छैटौं देखि दशौं स्थान सम्म हासिल गर्ने खेलाडीले समान एक हजार रुपैयाँ प्राप्त गरे ।
‘चेतनशील युवा सशक्तिकरण’ भन्ने नाराका साथ आयोजना भएको दौड दशरथ रंगशालाबाट सुरु भएर सुन्धारा, वीर अस्पताल हुदै केशलमहल पुग्नेछ । त्यसपछि नारायणहिटी संग्राहलयको दक्षिण गेट हुदै घण्टाघर, भृकुटीमण्डप, भद्रकाली, शहीद गेट, सुन्धारा हुदै दशरथ रंगशालामा आएर सकिएको थियो ।
प्रतियोगितामा तीन विभागीय टिमका खेलाडी सहित देशभरका ४८ जिल्लाबाट ३ सय ८६ जना खेलाडीले सहभागिता जनाएका थिए ।
विजेतालाई राष्ट्रिय खेलकुद परिषद (राखेप) का सदस्य सचिव टंकलाल घिसिङ लगायतले पुरस्कृत गरेका थिए ।
प्रतियोगितालाई काठमाडौं महानगरपालिका, राष्ट्रिय खेलकुद परिषद्, नेपाल एथलेटिक्स एसोसियसन, नेपाल इनभेष्टमेन्ट मेगा बैंग, खेलपाटी डटकम, इको प्यानल नेपाल, लुम्बिनी हेल्थकेयर लगायतले सहयोग गरेको थियो ।
