'ए' लिग सकियो, कुन क्लबले कति पुरस्कार पाए ?

काठमाडौं । सहिद स्मारक 'ए' डिभिजन लिग फुटबल प्रतियोगिता शनिबारबाट सकिएको छ ।

त्रिपुरेश्वरस्थित दशरथ रंगशालामा शनिबार जावलाखेल युथ क्लब र थ्री स्टार क्लबबीचको खेलसँगै यस सिजनको लिग सकिएको हो ।

डबल राउण्ड रोबिनको आधारमा भएको लिगको अन्तिम खेलमा थ्री स्टार क्लबले जावलाखेल युथ क्लबलाई १-० ले हराएको छ ।

यस सिजनको लिगको उपाधि चर्च ब्वाइज युनाईटेडले जितेको छ । चर्च ब्वाइजले डेब्यु सिजनमै लिगको उपाधि जितेको हो ।

यस्तै एफसी खुमलटार र विभागीय टोली एपीएफ क्लब रेलिगेसनमा पर्दै 'बी' डिभिजनमा घटुवा भएको छ ।

कसले कति पाए ?

लिगको उपाधिसँगै चर्च ब्वाइजले ७५ लाख नगद प्राप्त गरेको छ ।  

दोस्रो स्थान हासिल गरेको मछिन्द्र फुटबल क्लबले ५० लाख प्राप्त गरेको छ ।

नेपाल पुलिस क्लबले तेस्रो हुँदै २५ लाख रुपैयाँ पाएको छ ।

फेयर प्ले टोली नेपाल पुलिस क्लबले ३ लाख प्राप्त गरेको छ ।

यस्तै चर्च ब्वाइज युनाईटेड क्लबका कप्तान अनन्त तामाङ मोस्ट भ्यालुएबल प्लेयर हुँदै नगद ३ लाख प्राप्त गरे ।

सर्वाधिक गोलकर्ता बनेका मछिन्द्र फुटबल क्लबका आफिज ओलावाले २ लाख प्राप्त गरे ।

सर्वोत्कृष्ट गोलकिपर बनेका चर्च ब्वाइजका प्रिसोले २ लाख प्राप्त गरे ।

थ्री स्टार क्लबका लाकेन लिम्बुले इमर्जिङ प्लेयर घोषित हुँदै १ लाख ५० हजार प्राप्त गरे ।