धिर र गणनालाई अन्नपूर्ण म्याराथनको उपाधि

पोखरा । तेश्रो अन्नपूर्ण म्याराथनको उपाधि जुम्लाका धिरबहादुर बुढा र गणना भण्डारीले जितेका छन् ।

अन्नपूर्ण सेञ्चुरी महोत्सब अन्तर्गत शनिबार सम्पन्न ४२.१९५ किमि दौडमा पुरुष तर्फ जुम्लाका धिरबहादुर र महिलातर्फ जुम्लाकै गणना भण्डारीले जितेका छन् ।

विश्वकै कठिन रुट अन्नपूर्ण हिमालको काखबाट सुरू भएको दौड धिरबहादुरले ४ घन्टा १० मिनेट ५१ सेकेण्डमा पुरा गरेको प्रतियोगिताका मुख्य निर्णायक चन्द्र गुरुङले पोखरा स्पोर्टसलाई जानकारी दिएका छन् । निकै प्रतिस्पर्धात्मक रहेको प्रतियोगितामा धिरबहादुरले नेपाल आर्मीका होमलाल श्रेष्ठलाई २ मिनेट ३२ सेकेण्डले पछि पारेका थिए ।

नेपाल आर्मीका होमलालले ४ घन्टा १२ मिनेट १९ सेकेण्डमा दुरी पार गरी दोश्रो स्थान प्राप्त गर्न सफल भए भने नेपाल आर्मीकै बेद बहादुर सुनुवारले ४ घन्टा १६ मिनेट ४८ सेकेण्डमा दुरी पार गरी तेश्रो भएका छन् ।

महिला तर्फ पहिलो स्थान हुने क्रममा गणनाले ५ घन्टा ४३ मिनेट ०२ सेकेण्डमा दुरी पार गरिन् । त्यस्तै धादिङकी रशिला तामाङले ६ घन्टा ५ मिनेट ०२ सेकेण्डमा दुरी पार गर्दै दोश्रो स्थान प्राप्त गर्दा ओखलढुङ्गाकी चोकी शेर्पाले ६ घन्टा ११ मिनेट १६ सेकेण्डमा दौड पुरा गरी तेश्रो भएकी छन् ।

म्याराथन पुरुषतर्फ प्रथम हुने धावकले १ लाख ५० हजार, दोस्रो हुनेले १ लाख र तेस्रो हुनेले ७५ हजार पुरस्कार प्राप्त गरे । यस्तै महिलातर्फ प्रथम हुने धावकले ७५ हजार, दोस्रो हुनेले ५० हजार र तेस्रो हुनेले २५ हजार रुपैयाँ पुरस्कार प्राप्त गरेका छन् । बिजेताहरुलाई राष्ट्रिय खेलकुद परिषदका सदस्य सचिव टंकलाल घिसिङ, नेपाल ओलम्पिक कमिटिका महासचिव निलेन्द्रराज श्रेष्ठलगायतले नगद, मेडल तथा प्रमाणपत्र वितरण गरेका थिए ।

म्याराथन जेठ २० गते अन्नपूर्ण हिमालको आधार शिविरबाट सुरु भएर म्याराथन माछापुच्छ्रे आधार शिविर, बगर, देउराली, किम्रोङखोला, उरी हुँदै घान्द्रुकमा आएर सम्पन्न भएको हो । म्याराथन प्रतियोगितामा ९ महिला र ४० पुरुष गरी ४९ धावकको सहभागिता रहेको थियो ।

कास्कीको अन्नपूर्ण गाउँपालिका घान्द्रुकमा अन्नपूर्ण आरोहण दिवसको अवसरमा तेस्रो अन्नपूर्ण म्याराथन तथा सेन्चुरी पर्यटन महोत्सव सञ्चालन भइरहेको छ । सन् १९५० जुन ३ तारिखमा फ्रान्सेली मौसिर हर्जोगको टोलीले अन्नपूर्ण हिमालको चुचुरोमा पाइला टेकेको दिनलाई अन्नपूर्ण आरोहण दिवसको अवसरमा अन्नपूर्ण सेन्चुरी पर्यटन समितिले म्याराथनको समेत आयोजना गर्दै आएको छ ।