आर्मीमाथि जावलाखेलको सहज जित

काठमाडौं । सहिद स्मारक 'ए' डिभिजन लिग फुटबलमा जावलाखेल युथ क्लबले जित निकालेको छ ।

त्रिपुरेश्वरस्थित दशरथ रंगशालामा मंगलबार जावलाखेलले त्रिभुवन आर्मी क्लबलाई २-० गोल अन्तरले हराएको हो ।

जावलाखेलको जितमा एनकोटो मासोबीले दुई गोल गरे ।

खेलको ५५ औं मिनेटमा मोसाबीले गोल गर्दै जावलाखेललाई सुरुआती अग्रता दिलाएका थिए ।

त्यसपछि खेलको ७८ औं मिनेटमा मोसाबीले व्यक्तिगत दोस्रो गोल गर्दै जावलाखेललाई २-० को जित दिलाए ।

जावलाखेलको यो दशौँ जित हो । जावलाखेलले २३ खेलमा ३७ अंक जोडेको छ ।

जावलाखेल दोस्रो स्थानमा उक्लिएको छ ।

आर्मीको यो सातौं हार हो । आर्मी २३ खेलमा ३० अंक जोडेर पाँचौं स्थानमा रहेको छ ।