शीर्ष स्थानको चर्च ब्वाइज बराबरीमा रोकियो

काठमाडौं । सहिद स्मारक 'ए' डिभिजन लिग फुटबलमा शीर्ष स्थानको चर्च ब्वाइज युनाईटेड बराबरीमा रोकिएको छ ।

च्यासल मैदानमा सोमबार भएको खेलमा चर्च ब्वाइजले हिमालयन शेर्पा क्लबसँग १-१ गोलको बराबरी खेलेको हो ।

प्रतिस्पर्धात्मक खेलमा सुरुआती एक गोलको अग्रता जोगाउन नसक्दा चर्च ब्वाइजले अंक बाड्नु परेको हो ।

खेलको १३ औं मिनेटमा अन्जन विष्टले गोल गर्दै चर्च ब्वाइजलाई सुरुआती अग्रता दिलाएका थिए ।

तर, खेलको ३६ औं मिनेटमा अबायोमी फाकुन्लेले गोल गर्दै हिमालयनलाई १-१ गोलको बराबरीमा ल्याए ।

यस बराबरीसँगै चर्च ब्वाइज २० खेलमा ३७ अंक जोडेर शीर्ष स्थानमा रहेको छ ।

हिमालयन २० खेलमा २६ अंक जोडेर सातौं स्थानमा रहेको छ ।