संकटासँग जावलाखेलको रोमान्चक बराबरी

काठमाडौं । सहिद स्मारक 'ए' डिभिजन लिग फुटबलमा जावलाखेल युथ क्लबले संकटा क्लबसँग बराबरी खेलेको छ ।

त्रिपुरेश्वरस्थित दशरथ रंगशालामा आइतबार भएको खेलमा जावलाखेल र संकटाले २-२ गोलको बराबरी खेलेका हुन् ।  

रोमान्चक खेलमा सुरुआती दुई गोलको अग्रता संकटाले बनाएको थियो । तर, संकटाले त्यसलाई जोगाउन सकेन। 

खेलको ४३ औं मिनेटमा आयुष घलानले गोल गर्दै संकटालाई अग्रता दिलाएका थिए ।

खेलको ७३ औं मिनेटमा चन्द्रकुमार दासले गोल गर्दै संकटाको अग्रता दोब्बर बनाए ।

तर, खेलको ७७ औं मिनेटमा एन्कोटो मोसाबीले गोल गर्दै जावलाखेललाई २-१ को स्थितिमा ल्याए । 

त्यसपछि खेलको ८६ औं मिनेटमा समिराज थोकरले गोल गर्दै जावलाखेललाई २-२ गोलको बराबरीमा ल्याए ।

यस बराबरीसँगै जावलाखेलले २० खेलमा ३३ अंक जोडेको छ ।

संकटाले २० खेलमा २३ अंक जोडेको छ ।