मनाङको लगातार छैटौं हार, चर्च ब्वाइज विजयी

काठमाडौं । सहिद स्मारक 'ए' डिभिजन लिग फुटबलमा आठ पटकको च्याम्पियन मनाङ मर्स्याङ्दी क्लबले लगातार छैटौं हार व्यहोरेको छ ।

एन्फा कम्प्लेक्स सातदोबाटोमा आइतबार चर्च ब्वाइज युनाईटेडसँग ३-० ले पराजित हुँदै मनाङले छैटौं हार व्यहोरेको हो ।

चर्च ब्वाइजलाई जित दिलाउन अनन्त तामाङ, मौषम सुब्बा र साइमन लिम्बुले एक एक गोल गरे ।

खेलको ४१ औं मिनेटमा सुशिल शाहको क्रसमा कप्तान अनन्तले हेडर मार्फत गोल गर्दै चर्च ब्वाइजलाई सुरुआती अग्रता दिलाएका थिए ।

खेलको ५५ औं मिनेटमा मौषमले गोल गर्दै चर्च ब्वाइजलाई २-० को अग्रता दिलाए । उनले जोसेप बेम्पाको पासमा पेनाल्टी क्षेत्र भित्रबाट गोल गरे ।

त्यसपछि खेलको इन्जुरी समयमा साइमनले गोल गर्दै चर्च ब्वाइजलाई ३-० को जित दिलाए । मिलन राईको पासमा उनले गोल गरे ।

चर्च ब्वाइजको यो पाँचौं जित हो । चर्च ब्वाइजले १३ खेलमा २१ अंक जोडेको छ ।

चर्च ब्वाइज चौंथो स्थानमा रहेको छ ।

मनाङ पहिलो पटक लगातार ६ खेलमा पराजित भएको हो । मनाङले १३ खेलमा १५ अंक जोडेको छ ।

मनाङ दशौँ स्थानमा रहेको छ ।