एनआरटीले थ्री स्टारलाई हरायो

काठमाडौं । सहिद स्मारक 'ए' डिभिजन लिग फुटबलमा न्युरोड टिम एनआरटीले जित निकालेको छ ।

सातदोबाटोस्थित एन्फा कम्प्लेक्समा शुक्रबार एनआरटीले थ्री स्टार क्लबलाई १-० गोल अन्तरले हराएको हो ।

एनआरटीको जितमा सन्जिब विष्टले निर्णायक गोल गरे । उनले खेलको ३७ औं मिनेटमा गोल गरेका थिए ।

त्यसअघि थ्री स्टारका सन्तोष साहुखल पेनाल्टीमा चुकेका थिए । खेलको ३५ औं मिनेटमा सन्तोषले पेनाल्टीमा बाहिर प्रहार गरे ।

एनआरटीका गौरव श्रेष्ठले पेनाल्टी क्षेत्र भित्र पिटर सेगुनलाई लडाएपछि थ्री स्टारले पेनाल्टीको अवसर पाएको थियो ।

एनआरटीको यो चौंथो जित हो । एनआरटी १३ खेलमा १६ अंक जोडेर आठौं स्थानमा रहेको छ ।

थ्री स्टारको यो तेस्रो हार हो । थ्री स्टार १३ खेलमा २२ अंक जोडेर दोस्रो स्थानमा रहेको छ ।

यस हारसँगै थ्री स्टारले शीर्ष स्थानमा उक्लने अवसर गुमाएको छ ।