हिमालयनसँग शीर्ष स्थानको जावलाखेल स्तब्ध

काठमाडौं । सहिद स्मारक 'ए' डिभिजन लिग फुटबलमा शीर्ष स्थानको जावलाखेल युथ क्लब पराजित भएको छ ।

त्रिपुरेश्वरस्थित दशरथ रंगशालामा जावलाखेललाई हिमालयन शेर्पा क्लबले २-१ गोल अन्तरले हराएको हो ।

हिमालयनको जितमा मानुएल नाना आग्योमाङ र पिस्टन मुतम्बाले एक एक गोल गरे ।

जावलाखेलका एनकोटो मासोबीले एक गोल फर्काए ।

खेलको दशौँ मिनेटमा मानुएल नाना आग्योमाङले गोल गर्दै हिमालयनलाई सुरुआती अग्रता दिलाएका थिए । कप्तान विश्वास श्रेष्ठको कर्नरमा पिस्टन मुतम्बालाई लाग्दै आएको बलमा टच दिदै गोल गरे ।

खेलको १९ औं मिनेटमा मुतुम्बाले गोल गर्दै हिमालयनलाई २-० को अग्रता दिलाए । खामिर गिल्सनले उपलब्ध गराएको पासमा पेनाल्टी बक्स भन्दा बाहिरबाट मुतुम्बाले सुन्दर गोल गरे ।

खेलको ७२ औं मिनेटमा एनकोटो मोसाबीले गोल गर्दै जावलाखेललाई २-१ को स्थितिमा ल्याए । समिराज थोकरको पासमा सिक्स यार्ड बक्स नजिक रहेका मोसाबीले वान टच गोल गरे ।  

त्यसपछि दुबै टोलीले थप गोल गर्न सकेनन् र खेल हिमालयनले २-१ ले आफ्नो पक्षमा पार्यो ।

त्यसबाहेक दुबै टोलीले अन्य गोलको अवसर खेर फालेका  थिए ।

४८ औं मिनेटमा जावलाखेलका फोडे फोफनाको क्रसमा समिराज थोकरले सिक्स यार्ड बक्स भित्रको प्रहार हिमालयन शेर्पाका गोलकिपर किशोर गिरीले उत्कृष्ट बचाउ गरे ।

खेलको ५७ औं मिनेटमा जावलाखेलका अब्दुलअजिजको कर्नरमा एनकोटो मासोबीको फ्री हेडरले पोस्टको दिशा लिन सकेन ।

खेलको इन्जुरी समयमा हिमालयनका अबायोमीको प्रहार पोस्टमा लाग्दै फर्किएको थियो ।

इन्जुरी समयमै जावलाखेलका हिसुब थपलियाको हेडर पोस्टको केहि माथिबाट बाहिरिएको थियो ।

हिमालयनको यो तेस्रो जित हो । हिमालयन १२ खेलमा १३ अंक जोडेर १२ औं स्थानमा रहेको छ ।

जावलाखेलको यो तेस्रो हार हो ।  जावलाखेल १२ खेलमा २३ अंक जोडेर शीर्ष स्थानमा रहेको छ ।