थ्री स्टार र मछिन्द्रको बराबरी

काठमाडौं । सहिद स्मारक 'ए' डिभिजन लिग फुटबलमा थ्री स्टार क्लब र मछिन्द्र फुटबल क्लबले बराबरी खेल्दै अंक बाडेका छन् ।

त्रिपुरेश्वरस्थित दशरथ रंगशालामा बुधबार थ्री स्टार र मछिन्द्रले गोलरहित बराबरी खेलेका छन् ।

प्रतिस्पर्धात्मक खेलमा दुबै टोलीले पाएको अवसरलाई सदुपयोग गर्न सकेनन् । जसको कारण खेल बराबरीमा सकिएको हो ।

खेलको ३९ औं मिनेटमा मछिन्द्रका ग्याल्सेन चेन्चोको हेडर पोस्ट माथिबाट बाहिरिएको थियो ।

४२ औं मिनेटमा पुजन उपरकोटीको कर्नरमा मछिन्द्रका चेन्चोको हेडर पोस्ट माथिबाटै गएको थियो ।

खेलको ४४ औं मिनेटमा आफिज ओलावालेको पासमा मछिन्द्रका चेन्चोको प्रहार पोस्ट बारमा लाग्दै फर्किएको थियो ।

४५ औं मिनेटमा थ्री स्टारका दिपेश गुरुङले पेनाल्टी क्षेत्र नजिकबाट बाहिर प्रहार गरे ।

खेलको ४७ औं मिनेटमा थ्री स्टारका सन्तोष शाहुखलले पेनाल्टी क्षेत्र भित्रबाट प्रहार गरेको बल बाहिरिएको थियो ।

खेलको ६७ औं मिनेटमा थ्री स्टारका लाकेन लिम्बुले गोल गरेका थिए । तर, अफसाइड रहेका अजयी मार्टिन्सले टच गरेपछि उनको गोलले मान्यता पाएन् ।

७० औं मिनेटमा मछिन्द्रका ओलावालेको हेडर थ्री स्टारका महेन्द्र कार्कीले हेडरमार्फत क्लियर गरे ।

यस बराबरीसँगै थ्री स्टार १२ खेलमा २२ अंक जोडेर दोस्रो स्थानमा रहेको छ ।

मछिन्द्र १२ खेलमा १७ अंक जोडेर छैटौं स्थानमा रहेको छ ।